ده‌قێ په‌یاما سه‌رۆك بارزانى د یازده‌مین سالیادا كاره‌ساتا شنگالێ دا
بناڤێ خودێ مه‌زن و دلۆڤان
ئه‌و تاوانا تیرۆرسێن داعش یازده سالان به‌رى نوكه ل دژى خویشك و برایێن ئێزدى كرى تاوانه‌ك بوو هه‌مى سنۆرێن نه‌مه‌ردیێ و دره‌نده‌یێ ده‌ربازكرن، ئه‌ڤه ئازاره‌كه چ جاران ژ بیرا مه ناچیت، قه‌ده‌را گه‌لێ كورد ئه‌و بوویه كو هه‌رده‌م دوژمنێ دلره‌ق و بێ وژدان هه‌یه و كاره‌سات ل دویف كاره‌ساتێ به‌رۆكێ گه‌لێ كوردستانێ گرتیه، ئه‌وا ل دژى خویشك و برایێن ئێزدى هاتییه‌كرن درێژه‌پێده‌را وان زنجیره كاره‌ساتانه یێن ل دژى گه‌لێ كورد هاتینه كرن و ل ده‌ف هه‌ر كه‌سه‌كى رۆهنه كو ب ئه‌گه‌را كورد بوون و بیروباوه‌رێن خۆ یێن ئاینى كه‌فتنه به‌ر پێلا رق و بێوژدانیێ یا تاوانبارێن داعشێ و هاتنه جینۆسایدكرن.
پشتى روودانێن وێ كاره‌ساتێ ل سه‌ر ده‌ستێ تیرۆرستێن داعشێ، گه‌لێ كورستانی و پێشمه‌رگه‌ى ب دل و ب گیان ل گه‌ل خوشك و برایێن خۆ بوون و ئه‌وا ژ ده‌ست هاتى بۆ رزگاركرنا ا ئاواره‌یان و ئازادكرنا شنگالێ و چیایێ شنگالێ هاته‌كرن، ل ڤێره رۆلێ هێزێن پێشمه‌رگێ كوردستانێ و هه‌مى وان قه‌هره‌مانان بلند دنرخینم كو دیرۆره‌كا پرشه‌نگدار تۆماركرن بۆ ئازادكرنا چیاێ شنگالێ و خوینا خۆ به‌خشى و تۆل ژ تیرۆرستێن داعشێ ڤه‌كرن و سه‌رێ تیرۆرستان خسته بن پێن ئێزدییان و هه‌روه‌سا سوپاسییا هێزێن هه‌ڤپه‌یمانان ژى دكه‌م كو ل سه‌ر هاریكارییا پێشمه‌رگى و تێكشكاندنا داعشێ رۆله‌كێ به‌رچاڤ دیت.
د یازده‌مین سالیادا كاره‌ساتا شنگالێ دا سلاڤ بۆ گیانێ شه‌هدیان و قوربانیێن وێ تاوانێ و هه‌مى وان تاوان و كۆمكژویان دهنێرین كو ب سه‌رێ گه‌لێ كوردستانی هاتین و پێدڤیه ده‌وله‌تا ئیراقێ قه‌ره‌بوویا قوربانییێن كاره‌ساتا شنگالێ و هه‌مى قوربانیێن وان جینۆسایدان بكه‌ت كو د ده‌رهه‌ق گه‌لێ كوردستانێ دا هاتینه كرن و دڤێت دوماهى ب هێز و ره‌فتارێن شۆفینیانه بهێت كو هه‌ر جار ب به‌هانه‌یه‌كێ و عه‌قلیه‌ته‌كا نه‌مرۆڤانه ئازارا گه‌لێ كوردستانێ دده‌ن.
مه‌سعوود بارزانى