ده‌قێ گۆتارا نێچیرڤان بارزانى، سه‌رۆكێ هه‌رێما كوردستانێ د یادا 11 سالییا جینۆسایدا شنگالێ دا
ئه‌ڤرۆ یادا ب ئازار یا یازده سالێن جینۆسایدا ئێزدیان ل بیردئینین، ب رێز و وه‌فادارى قوربانییێن وێ تاوانكارییا داعشێ ل بیر دئینین، پابه‌ندین ب پێشكێشكرنا هه‌مى پشته‌ڤانییه‌كێ بۆ وه‌لاتییێن ئێزدى و زێده‌بارى هه‌مى ئازارێن بۆرى ب ئۆمێد ل پاشه‌رۆژا وان ته‌ماشه دكه‌ین و پێكڤه كار دكه‌ین بۆ ده‌رمانكرنا برینێن وان.
جهێ داخ و دلگرانییه‌كا مه‌زنه كو یازده سالان هێشتا نێزیكى نیڤا ئێزدییان دره‌وشه‌كا سه‌خت یا ئابۆرى و كۆمه‌لایه‌تى و ده‌روونى ل ناڤا كه‌مپان دژین، ئه‌ركێ حكومه‌تا ئیراقێ یه خۆ ل وه‌لاتییێن ئێزدى باشتر بكه‌ته خودان، قه‌ره‌بوویا وان بكه‌ت و چ دى رێ نه‌ده‌ت شنگال و ناوچه‌یێن ئێزدییان گۆره‌پانا یارییا میلیشیا و گرۆپێن چه‌كدار و ئێكلاكرنا ئه‌جێندایێن هه‌رێمى بیت.
دڤێت باوه‌رى، پشتراستى، ئارامى، ئاساییش، ئاڤه‌دانى و خزمه‌تگۆزارى بۆ شنگالێ و ناوچه‌یێن دى ڤه‌گه‌ڕیت، دادپه‌روه‌رى بۆ كۆمه‌لگه‌ها ئێزدییان بجهـ بهێت و تاوانبار بگه‌هنه سزایێن خۆ، ژبه‌ر ڤێ یه‌كێ بجهئینانا رێككه‌فتنا حكومه‌تێن هه‌رێما كوردستانێ و ئیراقێ بۆ ئاسایكرنا ره‌وشا شنگال و ب پارێزگه‌هبوونا وێ دكه‌ین، هه‌روه‌سا داخواز ژ كۆمه‌لگه‌ها نێڤدهولهتى كر ژ هه‌مى روویه‌كى ڤه زێده‌تر د هاوا ئێزدییان بهێت.
سوپاسییا وان وه‌لاتان دكه‌م یێن كۆمكوژییا ئێزدییان ب جینۆساید ناساندى و دێ ل سه‌ر كار و بزاڤێن خۆ ژى به‌رده‌وام بین تا كو زێده‌تر ل سه‌ر ئاستێ نێڤدهولهتى ب جینۆساید بهێته ناساندن و سوپاس و پێزانین بۆ هاریكارییا هه‌ڤپه‌یمانییا نێڤدهولهتى ژى بۆ تێكشكاندنا داعشێ و خویشك و برایێن ئێزدى پشتراست دكه‌م كو هه‌رده‌م پارێزه‌رێ وانم تا ره‌ڤاندى مابن و كارێ نڤیسینگه‌هێ بۆ رزگاركرنا ره‌ڤاندیان و ئاشكراكرنا چاره‌نڤیسێ وان دێ به‌رده‌وام بیت.
سلاڤ بۆ گیانێ قوربانییێن ئێزدى و ئیراده‌یا هێز و خۆراگرییا ئێزدییان و سلاڤ ژى ل گیانێ هه‌مى وان پێشمه‌رگه‌یێن قه‌هره‌مان كو ب فه‌رمانا جه‌نابێ سه‌رۆك مه‌سعوود بارزانى بۆ رزگاركرنا شنگال و هه‌مى پێكهاتێن كوردسانێ و ئیراقێ گیانێ خۆ به‌خشى.