سه‌رۆك نێچیرڤان بارزانى ل گه‌ل شانده‌كێ كۆمارا ئیسلامى یا ئیرانێ كۆمبوو، سه‌رۆكێ هه‌رێمێ راگه‌هاند، ئه‌و ب گرنگ ته‌ماشه‌یى په‌یوه‌ندیێن ل گه‌ل ئیرانێ دكه‌ن.
نێچیرڤان بارزانى، سه‌رۆكێ هه‌رێما كوردستانێ ئه‌ڤرۆ ل گه‌ل شانده‌كێ كۆمارا ئیسلامى یا ئیرانێ ب سه‌رۆكایه‌تییا ره‌زا ره‌حمانى، پارێزگارێ ئازه‌ربایجانا رۆژئاڤا كۆمبوو.
د كۆمبوونێ دا سلاڤ و رێزێن مه‌سعوود پزیشكییان، سه‌رۆككۆمارێ ئیرانێ ب سه‌رۆك نێچیرڤان بارزانى راگه‌هاندن و خواستا وه‌لاتێ خۆ بۆ به‌رده‌ومیدانا په‌یوه‌ندیێن ل گه‌ل هه‌رێما كوردستانێ دوپاتكر.
په‌یوه‌ندی و هاریكاریێن هه‌ڤپشكێن پارێزگه‌هان ل گه‌ل پارێزگه‌ها هه‌ولێرێ و ئه‌و رێككه‌فتن كو بۆ گه‌شه‌پێدانا بازرگانى و ئاسانكارییا لڤینا بازرگانى یا ده‌رگه‌هێن سنۆرى به‌حسكرن، هاتنوچوونا زیاره‌تكارێن ئۆلى بۆ باشۆرێ ئیراقێ ب رێكا هه‌رێما كوردستانێ د ناڤا هه‌ر دو ئالییان دا ئالییه‌كێ دى یێ كۆمبوونا وان بوو.
ژ ئالیێ خۆ ڤه نێچیرڤان بارزانى، سه‌رۆكێ هه‌رێما كوردستانێ زێده‌بارى سلاڤان بۆ سه‌رۆككۆمارێ ئیرانێ دوپاتكر كو هه‌رێما كوردستانێ ب چ گرنگ ته‌ماشه‌یى په‌یوه‌ندیێن دیرۆكى ل گه‌ل كۆمارا ئیسلامى یا ئیرانێ دكه‌ت و خوازیاره د هه‌مى واران دا زیده‌تر په‌یوه‌ندی و هاریكارییا هه‌ڤپشك هه‌بیت.
د كۆمبوونێ دا پارێزگارێ هه‌ولێرێ ئاماده بوو، چه‌ندین هزر و پێشنیاز بۆ چاوانییا باشتركرنا لڤینا بازرگانى و هاتنوچوونا ده‌رگه‌هێن سنۆرى به‌حسكرن.