گەرەکا دی یا دانوستاندنێن رۆسیا و ئۆکراینا ب دویماهی هات، ل گۆرەیی بەیانا سەرۆکێ شاندا هەردو وەلاتان، هەردو ئالی ل سەر لهەڤگوهۆرینا هزارەک و 200 ئێخسیران رێککەفتن.
دو گەڕێن دانوستاندنان دناڤبەرا رۆسیا و ئۆکراینا دا هاتبوونە برێڤەبرن و هەردو جاران ژی ل سەر لهەڤگوهارتنا هژمارەیەکا ئێخسیر و زیندانییان رێککەفتبوون.
ئەڤرۆ، چارشەمبییێ، 23-7-2025، ئاژانسا تاسی یا رۆسی راگەهاند؛ گەڕا سێیێ یا دانوستاندنێن دناڤبەرا رۆسیا و ئۆکراینا دا، ل ستەنبۆلێ ب دویماهی هات.
دیارکر ژی ؛ رۆسیا و ئۆکراینا ل سەر لهەڤگوهۆرینا هزارەک و 200 ئێخسیران رێککەفتن.
دازانین ژی؛ کۆمبوون ل دەمژمێر 8:37 خۆلەکی ئێڤاری دەستپێکر و نێزیکی 40 خۆلەکان ڤەکێشا.
هەروەسان رۆستەم عومەرۆڤ، سکرتێرێ جڤاتا ئاسایشا ئۆکراینا پشتی کۆمبوونێ راگەهاند؛ مە پێشنیازەک بۆ رۆسیا کر کو ل دویماهییا مەها تەباخێ کۆمبوونەک دناڤبەرا ڤلادیمێر پۆتین، سه‌رۆكێ رۆسیا و ڤۆلۆدیمێر زێلێنسكی، سه‌رۆكێ ئۆكرانیا دا بهێتە برێڤەبرن، چونکی کارێ مە یێ دەستپێکی راگەهاندنا ئاگربەستەکا هەردەمی و دیدارا پۆتین و زێلێنسكییە.
عومەرۆڤی ئاشکراکر ژی؛ پتری هزارەک و 200 ئێخسیر و زیندانییان دێ ل گەل رۆسیا لهەڤگوهۆرن.
ژ ئالییێ خۆ ڤە ڤلادیمێر مێدێنسکی، شیرەتکارێ سەرۆکێ رۆسیا، کو سەرۆکاتییا شاندا وەلاتێ خۆ دکر گۆت: مە پێشنیازەک بۆ ئۆکراینا کر کو هزر د ئاگربەستەکا دەمکی یا 24 دەمژمێری هەتا 48 دەمژمێری دا بکەت.
مێدێنسکی هەروەسان دیار ژی کر؛ ل گەل ئۆکراینا گەشهتینە رێککەفتنێ کو ل سنۆرێ بیلارۆسیا و ئۆکراینا هزارەک و 200 زیندانییان و سێ هزار جەنازەیان لهەڤبگوهۆرین.
ئەوژی دیارکر؛ مە پێشنیازکر سێ گرۆپ بهێنە دانان بۆ وێ یەکێ پەیوەندییێن ل گەل ئۆکراینا دبەردەوام بن.