غەفار تەیب
ئەوچیایێن کو ٥٠ سالن بووینە جهێ بۆمب و بۆردۆمانێن بالەفران, دڤی دەمی هەموویێ دا چیایێ خێرێ خێر ژ خۆ نەدیتیە , زنجیرەیا پیرسی رۆژانە دهاتە قەتاندن , پیکەسەر نەدشیا سەرێ خۆ بلند بکەت , سەرێ سادان ب کپی مایەڤە , بێراتی ژ دویرڤە گازی دکر من بێهنا بهارێ دڤێتەڤە، لێ ئەف هەموویە ببونە گۆرەپانا ئاگری و پتریا جاران دەنگێ بۆردۆمانان ل ئەسمانان و قیریێن زارۆکان ل ئەردی تێکەل هەڤ ببون .
هەر سال مام مشیر د کەلە گەرما هاڤینێ دا ب ترس و لەرز ڤە بسەر بلنداهیا چیایان دکەفت و ئاڤا دبوو دەڤەرا زێبارێ ژبۆ کو بەرهەمێ خۆیێ سماقێ بچنن و ژیارا خۆ پێ ب رێڤە ببەن ، لێ دەستێن وی ب گولێن سماقێ ڤە بوو و چاڤێن وی ژی ل ئەسمانان بوون و دەما ئێڤاریان ژی دچۆ مال دگۆتە دایکا زارۆکان الحمداللە ئەڤرۆ ژی ب سەلامەتی هاتینەڤە ، ل ئالیێ دی یێ نەهلێ ژی تێهنا گەرما بۆردۆمانان دگەهشتە برنجێ جۆتیاران و جوانیا خۆ ژ دەستددا ، مێش هنگڤینێن مام احمدی ژی دبوونە خۆلی و نەد گەهشت بەرهەمێ خۆ بخۆت ، ئەو دار بەریێن کو تەمەنێ وان ١٠٠ سال ژی ژ بنی را دهاتە قەتاندن و رەژیێن وان ژی بارانێن زڤستانان ل شۆڤان کۆمدکرن .
ئەو پارچەیا بەهەشتێ ل جهێن گۆزاری ژی ئەوا کو ل دینارتێ دەستپێدکەت و دەرباز دبیت بۆ چەمانکێ ئەوژی دیتنا چاڤا و سۆتنا هناڤان بوون بۆ خەلکێ دەڤەرێ و ژ ترسا قوربانی دانێ خەلک نەدشیا سەرەدانا وان جهان بکەت ئێدی پشتی ڤێ قۆناغێ دێ پێلێن ئاڤێ یێن وان جهان ژی شەپۆلان کەنەڤە و دارێن وان دێ بەژنا خۆ بلندکەنەڤە و جارەکا دی سیهێ ل خەلکی کەنەڤە .
ئێدی ٢٠ گوندێن چۆلکری ژی دووبارە دێ ئاڤەدانیێ بیننڤە و دێ خەلکێ وان بێهنا ئاخا خۆ هەلکێشیتەڤە د ڤان دوو سالێن دوماهیێ دا ئەو شەش کەسێن بووینە قوربانی ژی ل سنورێ ناحیا دینارتێ دێ دناڤ گۆرێن خۆ دا تەنابنەڤە.
ئەڤە هەمی پشتی قۆناغا پرۆسا ئاشتیێ و دانانا چەکی یە ژ لایێ پەکەکێ ڤە .