سەرۆکێ شاندا حەجییێن هەرێما کوردستانێ راگەهاند: ئەڤ سالە دێ 5 هزار و 136 کەس ژ هەرێما کوردستانێ چنە حەجێ و حکومەتا هەرێما کوردستانێ بریاردایە 4 ملیار و 200 ملیۆن دیناران بۆ پشتەڤانییا پرۆسەیا حەجێ خەرج بکەت.
شێخ نیاز راغب نەقشبەندی، سەرۆکێ شاندا حەجییێن هەرێما کوردستانێ راگەهاند: 16-17ـێ گولانێ ب رێکا هشکاتییێ و 19ـێ گولانێ ب رێکا ئاسمانی، 5 هزار و 136 کەس ژ هەرێما کوردستانێ، بۆ مەرەما حەجێ، دێ چنە سعوودیێ.
هەروەسا ئەو ژی گۆت: هەمی بەرهەڤی هاتینەکرن و 16ـێ گولانێ دێ ئێکەم کاروان بۆ سعوودیێ ب رێ کەڤیت و مەسروور بارزانی، سەرۆکوەزیرێ هەرێما کوردستانێ وەزیرێ ئەوقاف و کاروبارێن ئایینی راستپاردییە کو 4 ملیار و 200 ملیۆن دیناران بۆ پشتەڤانییا پرۆسەیا حەجێ خەرج بکەت.
ئەو ژی دیار کر: ژ پارێزگەها هەولێر، دهۆک، ئیدارەیا سەربخۆ یا سۆران و زاخۆ، 17ـێ گولانێ دێ ئێکەم کاروان ب رێکا هشکاتییێ بەرەڤ سعوودییێ ب رێ کەڤیت و د دو رۆژان دا دێ گەهیت.
گۆت ژی؛ رێڤینگییا ئاسمانی دێ ژ 19ـێ گولانێ دەستپێکەت و هەتا 28ـێ گولانێ دێ بەردەوام بیت.
فەریزەیا حەجێ د ئایینێ ئیسلامێ دا ئێکە ژ ئەرکانان و د هەیڤا 'زولحیجە' دا ب ملیۆنان موسلمان بۆ مەرەما حەجکرنێ ژ جیهانێ قەستا مەککەها سعوودیێ دکەن.
سالا بۆری، ملیۆنەک و 833 هزار و 164 حەجییان سەرەدانا مەککەهێ کربوو و پێشبینی دهێتە کرن کو ئەڤ سالە رێژە پتر ببیت.