ب هەلكەفتا حەفتێ و ئێكەمین سالڤەگەرا دامەزراندنا هەردوو ڕێكخراوێن ئێكەتییا قۆتابییان و ئێكەتییا لاوێن دیمۆكراتی كوردستان، سەرۆك بارزانی پەیامەك بەلاڤكر.
دەقێ پەیاما سەرۆك بارزانی:
بناڤێ خۆدایێ مەزن و دلۆڤان
ب هەلكەفتا حەفتێ و ئێكەمین سالڤەگەرا دامەزراندنا ئێكەتییا قۆتابییێن كوردستانێ و ئێكەتییا لاوێن دیمۆكراتی كوردستان، گەرمترین پیرۆزباهییان ئاراستەی لاوو و قۆتابییێن خۆشتڤی یێن كوردستانێ دكەم و هیڤییا سەركەفتنێ و بەردەوامبوونێ بۆ دخوازم.
قۆتابی و لاوێن کوردستانێ هەر ل دەستپێكا دامه‌زراندنا خۆ ل شۆڕەشا ئیلۆنێ هەتا ئەڤرۆ، سەنتەرێ پێگەهاندنا كەسێن ب وەفا و خەباتگێڕ و سەركردەیێن ب شیان بوویە و هەردەم ووزە و تێهنا نوی دایە بزاڤا ڕزگاریخوازا كوردستانێ و د وێ ڕێكێ دا قۆربانی داینە.
هەردوو ڕێكخراوێن ئێكەتی قۆتابییان و ئێكەتی لاوێن دیمۆكراتی كوردستان د قۆناغێن نوكەدا پێدڤییە ل ئاست چاڤەڕێییا كومەلگەهێ و دۆزا ڕەوا یا گەلێ خۆ دا بن.
قۆتابی و لاوان هەردەم ئومێدا گەلێ كوردستانێ نە و پێدڤییە د خەبات و تێكۆشانێدا پابەندی بەهایێن بلند یێن ڕێبازا كوردایەتییێ و نشتیمانپەروەرییێ بن و ب چەكێ زانستی و هوشیاری خزمەتا ئارمانجێن بلند یێن گەلێ كوردستانێ و پێگەهاندنا گەنج ولاوێن هوشیار و باوەر بخۆ بكەن.
دووبارە پیرۆزباهییێ لێ دكەم و بمینن ب خێر و خۆشی
مەسعود بارزانی
18 شوات 2024