حکومەتا هەرێمێ رۆنکرنەک ل دۆر هنارتنا شایستەیێن دارایی ژ ئالییێ ئیراقێ ڤە بەلاڤکر.
د رۆنکرنێ دا هاتییە "پشتی پەسەندکرنا بودجەیا هەر سێ سالێن 2023،2024 و 2025ێ، پشتی چەندین دانوستاندن و لێکتێگەهشتنان د ناڤبەرا هەولێر و بەغدایێ دا پشکا دارایی یا هەرێمێ هاتە دیارکرن."
"جوداهییا د ناڤبەرا شایستەیێن دەستووری یێن هەرێمێ و ئەوا ب فعلی ژ ئالییێ حکومەتا فیدرالی ڤە د سێ سالێن بۆری دا هاتییە خەرجکرن ب قەبارەیەکێ مەزن هاتییە خەملاندن و هەرێم رویبروی دۆرپێچێن وەبەرهێنان و دارایی بوو."
"ل گۆرەی داتایان، ب گشتی شایستەیێن هەرێمێ گەهشتینە 58.3 ترلیۆن دیناران، لێ ئەوا ب فعلی بۆ هەرێمێ هاتییە هنارتن 24.3 ترلیۆن دینار دەرباز نەکرینە، کو دبیتە ٪41 یا مافێن دارایی یێن هەرێمێ و بتنێ ٪3.9 یا بودجەیا گشتی یا ئیراقێ."
"زێدەبارەی تەرخانکرنا کۆژمێ 165 ترلیۆن دیناران ژ ئالییێ حکومەتا فیدرالی ڤە بۆ خەرجییێن وەبەرهێنانێ، پشکا هەرێمێ سفر بوو.
ژ ئالییەکێ دی ڤە دۆسەیا پەترۆلێ و راگرتنا هنارتنا پەترۆلێ ل ئادارا سالا 2023ێ ب کۆژمێ 25 ملیار دۆلاران زیان ب ئابۆرێ ئیراقێ گەهاندییە."
"پشتی دەستپێکرنا هنارتنا پەترۆلێ ل دویماهییا سالا 2025ێ هەرێمێ 19.5 ملیۆن بەرمیل ب رێکا سۆمۆ هنارتینە، لێ هەر کێشە بۆ هنارتنا مووچەیان د بەردەوامبوون."
"حکومەتا فیدرالی بۆ سالێن 2023،2024 و 2025ێ مووچەیێن سالێ ب تەمامی نەهنارتینە. ل هەمبەر دا هەرێمێ کۆژمێ 919 ملیار دیناران ژ داهاتێ ناڤخۆ هنارتینە گەنجینەیا گشتی یا فیدرالی."