سەرۆک بارزانى ل گەل کونسلێ گشتى یێ نوى یێ پۆلەندا ل هەولێرێ کۆمبوو، سەرۆک بارزانى بەحس ل نەهامەتییێن گەلێ پۆلەندا کر.
سەرۆک مەسعوود بارزانى ئەڤرۆ چارشەمبێ 17-12-2025ێ ل پیرمام ل گەل ماچیج زایدل، کونسلێ گشتى یێ نوى یێ پۆلەندا ل هەولێرێ کۆمبوو.
د دیدارەکێ دا کونسلێ گشتى یێ پۆلەندا خۆشحالیا خۆ ب دیدارا سەرۆک بارزانى نیشان دا و ئامادەییا خۆ بۆ زێدەتر گەشەپێدانا پەیوەندیێن ناڤبەرا هەرێما کوردستانێ و پۆلەندا د هەمى وارەکى دا دەربڕى، هەروەسا دلخۆشییا خۆ ژى ب پێشکەفتنا هەرێما کوردستانێ ژ روویێ ئارامى، ئاساییش و ئاڤەدانییێ ڤە دەربڕى و پەسنا خۆڕاگرى و تێکۆشینا خەلکێ کوردستانێ کر بۆ زالبوون ب سەر وان ئاستەنگان و نەهامەتییێن بۆرى یێن ب سەردا هاتین.
ژ ئالییێ خۆ ڤە سەرۆک بارزانى پیرۆزباهییا دەستبکاربوونا کونسلێ نوى یێ پۆلەندا ل هەولێرێ کر و پشتەڤانییا خۆ و هەرێما کوردستانێ دەربڕى بۆ گەشەپێدان و باشترکرنا پەیوەندیێن دو ئالى و هەروەسا سەرۆک بارزانى بەحس ل وان نەهامەتی و نەخۆشییان کر یێن د دەمێن بۆرى دا ب سەرێ گەلێ پۆلەندا هاتین، بەلێ ئێکگرتووى و تێکۆشینا وان شیا ب سەر ئاستەنگان دا زال بن و ب گەهنە ئەفرۆ کو پۆلەندا بوویە ئێک ژ وەلاتێن پێشکەفتى یێن ئەورۆپا و جیهانێ.
رەوشا ناوچێ، ئیراقێ ب گشتى و دیرۆک و خەبات و تێکۆشینا گەلێ کوردستانێ و بەحسکرنا سروشت و دیمەنێن جوان یێن کوردستانێ تەوەرێن دى یێن کۆمبوونێ بوون.