فێدراسیۆنا نێڤدەولەتی یا تەپا پێی (فیفا) و جڤاتا ئێكەتیا نێڤدەولەتی یا تەپا پێی (ئیفاب)، دەرگەهێ گوهۆڕینێن مەزن و ڕیشەیی ل هەمبەر شێوازێ یاریکرنا تەپا پێی ڤەکر، ب جێبەجێکرنا سیستەمەکێ نوی یێ ئۆفسایدێ د یاریێن تەپا پێی دا.
هزرا ڤێ گوهۆڕینێ ژ ئارسن ڤینگەرێ ڕاهێنەرێ فەرەنسی ژێدەر گرتیە، کو دەمەکێ درێژە بانگەشێ بۆ هزرا ڤێ گوهۆڕینا مەزن دکەت.
ڤینگەر داخوازێ دکەت، ئۆفساید تەنێ وی دەمی بهێتە هەژمارتن، دەمێ هێرشبەر ب تەمامییا لەشێ خۆ دکەڤیتە پشت دوماهیک بەرەڤانێ تیپا هەڤڕک.
فیفا و ئیفاب، کو بەرپرسن ژ دانان و جێبەجێکرنا یاسایێن تەپا پێی، دخوازن وێ یاسایێ بێخنە وارێ جێبەجێکرنێ کو ب "یاسایا ڤینگەر" بۆ ئۆفسایدێ یا بەرنیاسە.
ڤینگەر کو نوکە پۆستێ ڕێڤەبەرێ پێشخستنا تەپا پێی ل فیفا هەیە، داخوازا پەیڕەوکرنەکا نوی بۆ سیستەمی دکەت، ئەو دبێژیت تەنێ وی دەمی ئۆفساید بهێتە هەژمارتن، دەمێ هێرشبەر ب تەمامییا لەشێ خۆ ژ دوماهیک بەرەڤانێ تیپا بەرامبەر دەرکەڤیت، ئەڤە ب تەمامی دێ گوهۆڕینێ د وی سیستەمی دا کەت یێ کو نوکە دهێتە پەیڕەوکرن و ب سانتمێتران دەرکەفتنا هێرشبەری ژ بەرەڤانی، ب ئۆفساید دهەژمێریت.
چاکسازییێن ڤینگەری د یاسایێن ئۆفسایدێ دا ل سالا ٢٠٢٠ دەستپێکرینە، د بنەڕەت دا خزمەتەکا مەزن یا هێرشبەران دکەت. سیستەمێ نوی ل ٢٠ێ مەها بهێت د کۆمبوونا ئیفاب ل لەندەن دێ پێداچوونەکا تەمام تێدا هێتە کرن، بەری کو د کۆمبوونا گشتی یا فێدراسیۆنا نێڤدەولەتی دا ل وێڵز ل مەها دوی (شوبات) یا سالا بهێت بێخنە دەنگدانێ.
هەکە پێشنیاز قۆناغا ئێکێ دەرباز بکەت و د کۆمبوونا گشتی یا فیفا دا ل مەها دوی یا بهێت جێبەجێ ببیت، ب ڕازیبوونەکا نیڤ دوماهیێ دهێتە دانان.
ڕۆژنامەیا 'ئەی ئێس' یا ئیسپانی دبێژیت، ئارمانج ئەوە یاسایا نوی ب زووترین دەم و ل وەرزێ دی یێ ٢٠٢٦-٢٠٢٧ ل سەرجەم خول و پاڵەوانیتییان بهێتە جێبەجێکرن.
جیانی ئینفانتینۆ، سەرۆکێ فیفا، ل لوتکەیا وەرزشی یا جیهانی کو ڤێ هەفتیێ ل دوبەی هاتە ئەنجامدان، گوت: "ئەم دێ دیڤچوونێ ل یاسایا نوی یا ئۆفسایدێ کەین کو ل ماوەیێ چەند سالێن بوری دا لێکۆلینێن زێدەتر ل سەر هاتینە کرن و وەسا ددانیت کو دڤێت هێرشبەر ل پشت بەرەڤانی یان ل هەمان ئاستێ وی بیت، دا کو نەبیتە ئۆفساید."
ئینفانتینۆ زێدەتر گوت: "ل پاشەڕۆژێ دێ وەسا لێ هێت کو هێرشبەر دڤێت ب تەمامییا لەشێ خۆ ژ بەرەڤانی دەرباز ببیت، دا کو ببیتە ئۆفساید."
یاسایا نوی سالا ٢٠٢٣ د پاڵەوانیتیێن لاوان دا ل ئیتالیا و سوێد هاتە تاقیکرن ب ئارمانجا دەستنیشانکرنا ئاستێ گونجانا وێ گوهۆڕینێ ل گەل ڕەوشا ڕاستەقینە یا تەپا پێی ل ناڤ یاریگەهان دا.
وەسا دیارە گوهۆڕینێ ڕەزامەندییا بڕیاردەرێن تەپا پێی ب دەستڤە ئینایە و جێبەجێکرنا وێ یا نێزیکە.
ئارسن ڤینگەر سالا ٢٠٢٠ ل دەستپێکا خستنەڕوویا پڕۆژەیێ خۆ گوت: "ئەز دخوازم سیستەمی ب شێوازەکی بگوهۆڕم، کو تەمامییا لەشێ هێرشبەری ژ دوماهیک بەرەڤان دەرباز ببوو، دا کو ئۆفساید بهێتە هەژمارتن."