سەرۆک مەسعوود بارزانی ل گەل شاندەکێ وەزارەتا دەرڤە یا ژاپۆنێ کۆمبوو، سەرۆک بارزانی راگەهاند؛ هێڕشێن مینا یێن کورمۆرێ کاروانێ پێشکەفتنا هەرێمێ ناراوەستینن.
بارەگەهێ بارزانی بەلاڤکر: ئەڤرۆ رۆژا سێشەمبی 2-12-2025ێ سەرۆک بارزانی ل پیرمام پێشوازی ل شاندەکا وەزارەتا دەرڤە یا ژاپۆنێ کر کو پێکهاتبوون ژ ماسامیچی سوگایا، بەرپرسێ دۆسیەیا رۆژهەلاتا ناڤین و ئیراقێ ل وەزارەتا دەرڤە یا ژاپۆنێ و ئاکیارا ئیندۆ، بالیۆزێ ژاپۆنێ ل ئیراقێ و چەند دپلۆماتکارێن دی یێن ژاپۆنی.
د دیدارێ دا شاندا وەزارەتا دەرڤە یا ژاپۆنێ دەربارەی سەرکەفتنا پارتی و ئینانا زێدەتری ملیۆن دەنگان د هەلبژارتنێن پەڕلەمانێ ئیراقێ دا پیرۆزباهییا سەرۆک بارزانی کر و ب نیشانەکا رون ل پێگەهێ پارتی دیمۆکراتی کوردستان ل ناڤا خەلکی هەژمار کرو پەسنا وێ پێشکەفتنی کر یا ل هەرێما کوردستانێ چێبووی و ب ئەگەرەکێ گرنگ ل قەلەم دا بۆ پێشڤەچوونا وەبەرهێنانا بیانی و بەرهەڤییا وەلاتێ خۆ ژی راگەهاند بۆ پێشڤەبرنا پەیوەندییان د بۆارێن جودا- جودا دا ل گەل هەرێمێ.
هەڤدەم شاندا ژاپۆنی دلگرانییا خۆ ژی بۆ هێڕشا ڤێ دویماهییێ یا کورمۆرێ نیشاندا و راگەهاند؛ ئەڤ هێڕشە دژی سەقامگری و وزەیا ئابۆری یا ئیراق و دەڤەرێ نە.
ژ ئالییێ خۆ ڤە سەرۆک بارزانی سەرباری ب خێرهاتنا گەرم ل شاندا مێهڤان پێشوازی ل پیشڤەچوونا پەیوندیێن د ناڤبەرا هەردو ئالییان دا کرو راگەهاند؛ گەلێ کوردستانێ هەردەم نێرینەکا ئەرێنی بۆ گەل، دەولەت و شارستانییەتا ژاپۆنێ هەبوویە.
سەرۆک بارزانی سەرباری ئاماژەدانێ ب ئەگەرێن ل پشت هێڕشا سەر کورمۆرێ راگەهاند؛ ئەڤ جۆرە هێرشە، کاروانێ پێشکەفتنا هەرێمێ ناراوەستینن و د درێژاهییا گۆتنێن خۆ دا سەرۆک بارزانی بەحس ل پرۆسەیا سیاسی یا ئیراق و قۆناغا پشتی هەلبژارتنان و کێموکاسیێن یاسایا هەلبژارتنان و ئاستەنگێن بەرامبەر پرۆسەیا سیاسی یا ئیراقێ کر.
پاشەرۆژا کوردان ل سووریێ گاڤێن پرۆسەیا ئاشتییێ ل تورکیا تەوەرەکێ دی یێ کۆمبوونا سەرۆک بارزانی و ساندا وەزارەتا دەرڤە یا ژاپۆنێ بوون.