ئاکر نیوز
ژ بەر وێ هەلویستا مرۆڤایەتی یا بێ وێنە یا هەمبەر زارۆکێن نەخۆش نیشاندای، جەماوەرێ یانەیا زاخۆ سەرنجا جیهانێ ڕاکێشا و ب فەرمی خەلاتێ "باشترین جەماوەر" یێ فیفایێ بۆ سالا ٢٠٢٥ ب دەستڤە ئینا.
فێدراسیۆنا تەپا پێ یا جیهانی (FIFA) د ڕێورەسمێن بەلاڤکرنا خەلاتێن "زە بێست" (The Best) دا، ڕاگەهاند کو جەماوەرێ یانەیا زاخۆ بوویە سەرکەفتیێ خەلاتێ باشترین جەماوەرێ سالا ٢٠٢٥. ئەڤە ژی وەک ڕێزلێنانەک بۆ بزاڤێن وان د هاریکاریکرنا وان زارۆکێن کو ب دەستێ نەخۆشیێ دنالن و دیمەنەکێ بێ وێنە ل یاریگەهێ دروستکری.
جەماوەرێ یانەیا کوردستانی دەمێ سەرنجا جیهانێ ب لایێ خۆ دا ڕاکێشای کو بەری دەستپێکرنا یارییا وان هەمبەر یانەیا "حدود" د خولا ستێرێن ئیراقێ دا ل ١٣ێ مەها ٥، ب هەزاران بووکەڵە (یاریێن زارۆکان) هاڤێتینە ناڤ یاریگەهێ. پاشی ئەو دیاریە ل سەر چیمەنێ یاریگەهێ هاتنە کۆمکرن و ل سەر زارۆکێن نەخۆش دا هاتنە بەلاڤکرن.
د بەیاننامەیا یانەیێ دا هاتیە: "هاڤێتنا یاریێن زارۆکان بۆ ناڤ یاریگەهێ، گیانەکێ مرۆڤایەتی یێ نموونەیی نیشاندا و ژ لایێ جڤاکێ وەرزشی ل کوردستان، ئیراق و ئاسیایێ دانپێدان پێ هاتیە کرن".
هەروەسا یانەیا زاخۆ ل دۆر جەماوەرێ خۆ دبێژیت: "جەماوەرێ مە بڕبڕا پشتا تیپێ نە و بەردەوام ب چالاکیێن خۆ یێن داهێنەرانە سەرنجان ڕادکێشن. هیڤیدارین پشتەڤانیێن وان بەردەوام بن د دەمەکێ دا ئەم بزاڤێ بۆ سەرکەفتنێن مەزنتر ددەین".
ئەڤ دەستپێشخەریا جەماوەرێ زاخۆ نە تەنێ ل سەر ئاستێ ناڤخۆ، بەلکۆ ل سەر ئاستێ جیهانێ ژی دەنگڤەدانەکا مەزن لێ کەفت و بوو ئەگەرێ وێ چەندێ کو ناڤێ یانەیێ د دیرۆکا فیفایێ دا ژ بەر کارەکێ مرۆڤایەتی بهێتە تۆمارکرن.