ئاکرێ نیوز
مه‌سروور بارزانى، سه‌رۆكێ حكومه‌تا هه‌رێما كوردستانێ، د پێنگاڤه‌كا گرنگ دا بۆ پشته‌ڤانیكرنا كه‌رتێ وه‌رزشێ ل هه‌رێمێ، هاریكاریێن ماددى پێشكێشى یانه‌یا وه‌رزشى یا نه‌ورۆز كرن. ئه‌ڤ هاریكاریا دارایى كو بڕێ وێ ٤٥٠ ملیۆن دینار بوو، ب رێكا نڤیسینگه‌ها سه‌رۆكێ حكومه‌تێ هاتیه پێشكێشكرن و د ده‌مه‌كى دایه كو یانه د ره‌وشه‌كا دارایى یا گه‌له‌ك خراب دا ده‌رباز دبوو.
یانه‌یا نه‌ورۆز، كو ئێك ژ یانه‌یێن دیار یێن كوردستانێ یه و پشكدارى د خۆلا ستێرێن ئیراقێ دا دكه‌ت، د ماوێ بۆرى دا تووشى قه‌یرانه‌كا دارایى یا كویر ببوو. ئه‌ڤ ره‌وشا خراب گه‌هشتبوو وى راده‌ى كو ده‌نگۆیێ ڤه‌كێشانا یانه‌یێ ژ خۆلا ئیراقێ به‌لاڤ ببوو. ژ ئه‌گه‌رێ ڤان ئاریشه‌یێن دارایی، راهێنه‌رێ یانه‌یێ ده‌ست ژ كارێ خۆ كێشابوو و هنده‌ك یاریكه‌ران ژى ژ به‌ر نه‌دیاریا پاشه‌رۆژا یانه‌یێ، داخوازا به‌ردانێ كربوو.
ژ لایه‌كێ دى ڤه و وه‌ك هه‌ستكرن ب به‌رپرسیاریێ، یانه‌یێن دى یێن كوردى ده‌ست ب كه‌مپینێن كۆمكرنا هاریكاریان بۆ یانه‌یا نه‌ورۆز ل باژێرێن كوردستانێ كربوون، وه‌ك پێنگاڤه‌ك بۆ هندێ كو یانه بشێت به‌رده‌وامیێ ب كارێن خۆ بده‌ت و د خۆلێ دا بمینیت.
ژ هه‌ژى گۆتنێ یه، یانه‌یا نه‌ورۆز ل سالا ٢٠٢١ێ بۆ ئێكه‌م جار د مێژوویا خۆ دا سه‌ركه‌فت بۆ خۆلا ستێرێن ئیراقێ و وه‌ك دووه‌م یانه‌یا باژێرێ سلێمانیێ پشكدارى د ڤێ خۆلێ دا كریه. ئاریشه‌یێن دارایی یێن یانه‌یێ پشتى وێ چه‌ندێ سه‌رهه‌لدان كو پشته‌ڤانێ سه‌ره‌كى یێ یانه‌یێ تووشى ئاریشه‌یان بوو، و ئه‌ڤ چه‌نده بوو ئه‌گه‌ر كو یانه بكه‌ڤیته بن باره‌كێ گران یێ قه‌ران و نه‌شێت پێدڤیێن خۆ یێن سه‌ره‌كى ژى دابین بكه‌ت.
ئه‌ڤ پشته‌ڤانیا سه‌رۆكێ حكومه‌تا هه‌رێما كوردستانێ د ده‌مه‌كێ هه‌ستیار دا دهێت و چاڤه‌رێ دهێته كرن ببیته ئه‌گه‌رێ سه‌قامگیریا ره‌وشا دارایی یا یانه‌یێ و هاریكار بیت كو یانه‌یا نه‌ورۆز بشێت ب شێوه‌یه‌كێ باشتر به‌رده‌وامیێ ب هه‌ڤركیێن خۆ د خۆلا نایابا ئیراقێ دا بده‌ت.