ئاکرێ نیوز
وی ملیاردێرێ 32 سالی، بڕیار دایە هەمی سامانێ خۆ کو پترە ژ ملیارەک دۆلارێن ئەمریکی، ببەخشیتە نەیماری ستێرا جیهانی و بەرازیلی یا تەپا پێی.
لیو دیاز، ڕۆژنامەڤانێ دیارێ بەرازیلی، ل سەر ماڵپەرێ (portalleodias) بەلاڤکر، کو ل هەیڤا تەممووزا 2023، وی زەنگینێ کو ئاریشێن ساخلەمیێ هەنە و نەخۆشە، چوویە نڤیسینگەها دادنووسی ل باژێرێ پۆرتۆ ئەلیگری دا کو ب فەرمی پەنجەمۆر و ئیمزایا دووماهیێ ل سەر وەسیەتناما خۆ بدەت بۆ دیارکرنا میراتگرێ خۆ.
سامانێ وی ملیاردێرێ بەرازیلی (5.4) ملیار ڕیالێن بەرازیلی یە (کو دبیتە نێزیکی ملیارەک دۆلارێن ئەمریکی) و ب فەرمی دایە نەیمار دا سیلڤا سانتۆس جۆنیۆر. ئەڤە د دەمەکیدایە کو سامانێ نەیماری بخۆ ژی نێزیکی ملیارەک دۆلارایە، وەک ماڵپەرێ میترۆپۆلیس دیارکری.
وی زەلامێ بەرازیلی ناسناما خۆ بۆ میدیایان ئاشکرا نەکریە، بتنێ هند نەبیت کو نەڤێت وی سامانی بۆ کەسێن نێزیکێن خۆ بجە بهێلیت. هەروەسا نەڤێت بۆ حکومەتا بەرازیلێ بچیت، لەورا باشترین هەلبژاردن ل دەف وی ئەوبوو کو پێشکێشی ستێرا خۆ یا دلخواز بکەت.
ئەو کەسێ کو هەیا نوکە ناسناما وی ئاشکرا نەکریە، چ میراتگرێن ڕاستەوخۆ نینن، ژبەرکو وی هەڤژینی پێک نەئینایە و زارۆک نینن، و دبێژیت: "ئەڤە وەسیەتا من یا دووماهیێ یە، مال و مولک و سامانێ خۆ بۆ نەیماری بجە دهێلم و پێشکێشی وی دکەم."
هەیا نوکە میدیایێن بەرازیلێ چ پێزانین بەلاڤنەکرینە، کا ئەو ملیاردێرە ل ژیانێ مایە یان نە، و هەروەسا هەلویستێ نەیماری لسەر وی سامانی چیە یێ کو بڕیارە بۆ وی بمینیت.