ئەڤرۆ، دووشەمبی، ٢٢ی ئەیلولا ٢٠٢٥، چاڤێن حەژێکەرێن تەپاپێیێ دێ ل سەر باژێرێ پاریس بن، کو ل وێرێ دێ ئاهەنگا ٦٩ـێ یا خەلاتێ پر بها یێ "بالۆن دۆر" ( توپا زێرین) هێتە گێران. ئاهەنگ دێ ل شانۆیا بناڤ و دەنگ یا شاتلی (Théâtre du Châtelet) بڕێڤەچیت.
ئەڤ سالە ئاهەنگ ژ ئالیێ گۆڤارا "فرانس فوتبۆل" و ئێکەتیا تەپاپێی یا ئەورۆپا (UEFA) ڤە ب هەڤکاری دهێتە ڕێکخستن. د ئاهەنگێ دا دێ باشترین یاریزانێن جیهانێ ل سەر ئاستێ زەلام و ئافرەتان بۆ وەرزێ ٢٠٢٤-٢٠٢٥ هێنە خەلاتکرن.
خەلاتێن سەرەکی:
ئەڤ سالە دێ چەندین خەلاتێن نوی هێنە دان، و بۆ ئێکەم جار د مێژوویێ دا دێ هەژمارا خەلاتان بۆ هەردوو ڕەگەزان وەکی ئێک بیت. خەلاتێن سەرەکی ئەڤەنە:
بالۆن دۆر: بۆ باشترین یاریزانێ زەلام و ئافرەت.
خەلاتێ کۆپا: بۆ باشترین یاریزانێ گەنج یێ زەلام و ئافرەت.
خەلاتێ یاشین: بۆ باشترین گۆلپارێزێ زەلام و ئافرەت.
خەلاتێ گێرد مولەر: بۆ گۆلکارێ سالێ.
خەلاتێ یۆهان کرویف: بۆ باشترین راهێنەرێ زەلام و ئافرەت.
خەلاتێ یانەیا سالێ: بۆ باشترین یانەیا زەلام و ئافرەتان.
خەلاتێ سۆکراتیس: بۆ کارێن مرۆڤایەتی یێن ژ لایێ یاریزانان ڤە هاتینە کرن.
کاندیدێن بەرچاڤ:
پێشبینی دهێتە کرن کو هەڤریکی د ناڤبەرا یاریزانان دا دێ یا ب هێز بیت، ب تایبەتی پشتی سەردەمێ مێسی و ڕۆنالدۆی. د ناڤ کاندیدێن سەرەکی بۆ بدانانا خەلاتێ بالۆن دۆر یێ زەلامان دا، ناڤێن وەکی عوسمان دیمبێلی و ڤیتینیا ژ یانەیا پاریس سانجێرمان، و یاریزانێ گەنج و ب شیان لامين يامال ژ یانەیا بەرشەلۆنا دهێنە گۆتن. هەروەسا یاریزانێن دی یێن وەکی جود بێلینگهام، کیلیان مباپێ، و ئیرلینگ هالاند ژی د لیستێ دا نە.
لیستا کاندیدان ل ٧ی تەباخا ٢٠٢٥ هاتبوو ڕاگەهاندن. و ئەڤرۆ دێ دیار بیت کێ دێ تاجێ وەرگریت و ناڤێ خوە د مێژوویا تەپاپێیێ دا تۆمار کەت.