ئه‌فسه‌رێ ده‌سته‌یا ڤه‌كۆلین و كۆمكرنا گرۆڤه‌یان راگه‌هاند، ئه‌ڤرۆ 22 روفاتێن دى یێن قوربانیێن ده‌ستێن داعشێ دێ گه‌هنه شنگالێ و بڕیاره سوبه‌هى د رێوره‌سمه‌كێ تایبه‌ت دا بهێنه ڤه‌شارتن.
عه‌قید شاكر مه‌حموود میرانى، ئه‌فسه‌رێ ده‌سته‌یا ڤه‌كۆلین و كۆمكرنا گرۆڤه‌یان گۆت: بڕیاره ئه‌ڤرۆ گه‌ڕا هه‌شتێ یا روفاتێن ئێزدى یێن قوربانیێن ده‌ستێ رێكخستنا تیرۆرستییا داعشێ ب گه‌هنه شنگالێ كو هه‌ژمارا وان 22 روفاتن و د رێوره‌سمه‌كێ هه‌ژى دا دێ هێنه ڤه‌شارتن.
ل ده‌ما هاتنا رێكخستنا تیرۆرستى یا داعشێ ده‌هان كۆمكوژى دژى كوردێن ئێزدى ل شنگالێ و ره‌خودۆرێن وێ كرن و تا نوكه ژى چه‌ندین گۆڕ ماینه هێشتا نه‌هاتینه ڤه‌كرن.
پرۆسه‌یا ڤه‌كرنا گۆڕان به‌رده‌وامه لێ ب خاڤى و سستى برێڤه دچیت، چه‌ندین روفات تا نوكه ژى ل نۆشدارییا داد یا به‌غدایێ نه و هێشتا دى ئێن ئه‌ی یا وان نه‌هاتییه دیار و ئاشكراكرن، ئه‌ڤ یه‌ك ژى هه‌ر ئه‌فسه‌رێ ده‌سته‌یا ڤه‌كۆلینان گۆت.
عه‌قید شاكر مه‌حمود ئاشكراكر، د هه‌شت گه‌ڕان دا 318 روفات گه‌هشتینه شنگالێ و دى ئێن ئه‌ى بۆ هاتییه‌كرن و هێشتا ماینه.
هه‌شت گه‌ڕێن ده‌رخستنا روفاتان
گه‌ڕا ئێكێ 62 روفات
گه‌ڕا دووێ 42 روفات
گه‌ڕا سیێ 43 روفات
گه‌ڕا چارێ 55 روفات
گه‌ڕا پێنجێ 21 روفات
گه‌ڕا شه‌شێ 41 روفات
گه‌ڕا حه‌فتێ 32 روفات
گه‌ڕا هه‌شتێ 22 روفات
وه‌لاتیێن ئێزدى به‌رده‌وام گازنده‌یا وێ یه‌كێ دكه‌ن كو له‌ز ل ده‌رخستن و هه‌لدانا گۆڕان ناهێته‌كرن و ئه‌ڤێ یه‌كێ وه‌لاتیێن ئێزدى دلگران كرینه.