پولیسێن پارێزگەها دهۆکێ راگەهاند، ئەو توهمەتبارێن کۆ برێکا فیلبازیێ گوژمێ 63 ملیۆن دینار ژ خەلکێ سێمێلێ و تەناهیێ و خانکێ و شاریا دزین هاتنە دەستەسەرکرن.
هێمن سلێمان، پەیڤدارێ پولیسێن پارێزگەها دهۆکێ راگەهاند، پولیسێن نەهێلانا گونەهباریان ل سێمێلێ باندەکێ توهمەتبارێن فێلباز دەستەسەر کرن.
گوتژی، ئەڤ توهمەتبارە دگەل دوو توهمەتبارێن دی ل تورکیا رێککەفتینە کۆ ل تورکیا پەینەکێ ئینستگرامێ چێکریە و بانگەشێ دکەن کۆ دشێن ڤیزا شنگن بۆ خەلکی پەیداکەن و دەمێ خەلکێ مە برێکا تورێن جڤاکی و ئینستگرامێ دگەل توهمەتباران ئاخفتنە وەسا بۆ خەلکی دیار دکەن کۆ دڤێت ئەو کەسێ داخوازا ڤیزێ دکەت بۆ ئەوروپا وی کەسی هژمارەکا بەنکی هەبیت.
زێدەتر گوت، فێلبازان دگوتنە خەلکێ مە پارێزەرێن تایبەت هەنە دێ دگەل هەوە ئاخڤن ئەو توهمەتبارێن دهۆکێ ئێکێ ژ وان خۆ وەسا دایە دیارکرن کۆ پارێزەرە لێ ئەو نە پارێزەربوویە بەلکۆ شەهرەزایێ It ێ بوو و ب وێ رێکێ کۆد ژ خەلکی دزین و پارە دبرن کۆ گوژمێ 63 ملیۆن دینار ژ خەلکێ سێمێلێ و تەناهیێ و خانکێ و شاریا دزینە و نوکەژی ئەو توهمەتبار هاتینە دەستەسەرکرن.