سەرۆک بارزانی بۆ وەغەرا دوماهییێ یا کەریم شنگالی پەیامەک بەلاڤکر و راگەهاند؛ سەرەخۆشییێ ل خۆ، خێزان، کەسوکار و هەڤالێن کەریم شنگالی دکەم. شنگالی پێشمەرگەهێ ڕێبازا بارزانی و كوردایەتییێ بوو.
سەرۆک مەسعوود بارزانی بۆ وەغەرا دوماهییێ یا کەریم شنگالی، ئەڤرۆ، سێشەمبییێ، 10-6-2025، راگەهاند؛ خودێ ژێ رازی شنگالی د قویناغێن جودا-جودا یێن گەلێ مە و پارتی دیمۆکراتی کوردستان دا هەردەم ئێک ژ کادرێن ژێهاتی و ماندینەناس یێ پارتی و بزاڤا رزگاریخوازا کورستانێ بوویە.
گۆت ژی: د دەستپێک و هەلکرنا چریسکا شۆرەشا گولانێ دا فەرماندەیەکێ کارا و سەرەکی بوو. هەروەسا ل سەردەمێ خەباتا چیایی، پشتی سەرهلدانێ و د كاروبارێن سیاسی و ئیداری و دیپلۆماسی دا ئەركێن ل سەر ملێن خۆ ب دلسۆزانە و گەلەک ب بنەجهی ئەدا کرینە.
دیارکر ژی؛ خودێ ژێ رازی شنگالی، پێشمەرگەهێ ڕێبازا بارزانی و كوردایەتییێ بوو، بۆ من ژی وەک هەڤالەکێ نێزیک و هەڤالێ رێکا خەباتێ بوو. ژیێ خۆ ل پێناڤی دۆزا رەوا یا گەلێ کوردستانێ و بدەستخستنا ئارمانجێن بالا یێن گەلێ کوردستانێ تەرخان کر، ژ دەستدانا وی خوسارەتییەکا مەزنە.
ل دویماهییێ گۆت ژی: سەرەخۆشییێ ل خۆ، خێزان، کەسوکار، هەڤالێن کەریم شنگالی و سەرکردایەتی، کادر، ئەندام، ئالیگرێن پارتی، هەمی شۆرەشگێر و ئازادیخوازێن کوردستانێ دکەم. ژ خودایێ مەزن دخوازم رحا شنگالی ل بەهەشتا بەرین شاد بکەت و سەبر و هەدارێ بدەتە هەمی ئالییان.