غیاس خالد زێباری
سوباهی ٢٦/٥ رۆژەکا دیرۆکی و پڕشنگدارە د دیرۆکا گەلێ کورد دا، ب تایبەت دیرۆکا سیاسی و بزاڤا رزگاریخوازیا کوردستانی دا . ئەو رۆژە ئەوا هیڤی و ئارمانجێن نەیار و دوژمنێن گەلێ کورد بۆ هەتا هەتا بن ئاخ کری، ئەو ژی بەرپاپوونا شۆڕەشا گوڵانا نشتیمانی و پێشکەفتنخواز ب رێبەریا پارتی دیموکراتی کوردستان، ب چاڤدێری و رێنمایی یێن نەمر مەلا مستەفایێ بارزانی و سەرپەرشتیا سەرۆک مەسعود بارزانی و کاک ئدریسێ هەردەم ساخ .
شۆڕەشا گوڵانێ د ڕەوشەکا دژوار یا سیاسی و جڤاکی و پڕی ئاڵۆزیێن ئێمناهی هاتە بەرپاکرن، ئەو ژی رەوشا دژوارا پشتی رێکەفتنا خیانەتکاریا جەزائیر یا ٦ ێ ئادارا ساڵا ١٩٧٥ بوو دناڤبەرا سەدام و شاێ گۆر ب گۆر، ک گەهشتبوونە وێ باوەریێ ئیدی چ بزاڤێن سیاسی و نەتەوی و نشتیمانی یێن کوردستانێ ل باشوورێ کوردستانێ هەڵنادەڤە . ڕاستە وێ رێکەفتنا خیانەتکاریا جەزائیر ئاستەنگێن مەزن و دژوار چێکرن، چونکی رێکەفتنەکا هەرێمایەتی بوو ب پشتەڤانیا نیڤدەولەتی بەرامبەر شۆڕەشا ئیلۆنێ و پارتی دیموکراتی کوردستان، لێ ژلایەکێ دیتر دانپێدانەکا نیڤدەولەتی بوو ب هێز و مەزناهیا شۆڕەشا ئیلۆنێ و پارتی و بارزانیێ نەمر، چونکی د وێ باوەریێدا بوون رێکەفتنا ١١ ێ ئادارا ١٩٧٠ ێ یێ، دێ بیتە سەرکەفتنەکا مەزنا بزاڤا رزگاریخوازیا گولێ کورد و ب دەست ئینانا بەشەکێ زۆرێ مافێن نەتەوی و نشتیمانی ل سەر دەستێ پارتی و رێبازا بارزانی .
شۆڕەشا گوڵانێ ل دەمەکی سەرهەلدا کو هێشتا برینێن خیانەتا جەزائیر دکەلین و ڕووندکێن شۆڕەشگێر و نشتیمان پەروەرێن کورد نەهاتبوونە ڤەسترین. هێشتا ب هزارەها خێزان و ماڵباتێن کادر و پێشمەرگەهــ و نشتیمان پەروەرێن کورد د ئاوارەیی یێ دا بێ چارەنڤیس مابوون، پەیوەندیێن ژمارەکا زۆرا سەرکردێن شۆڕەشێ هاتبوونە بڕین و بەڵاڤی چەند وەڵات و دەڤەرا ببوون، رێکخستنێن پارتایەتی بێ رێنما و سەرپەرشت مابوون، خەلکێ کوردستانێ ل یێن ئاوارەی و ناڤخوە، د تەنگاڤی و شەپڕزەیەکا دارایی و ئێمناهی دابوون، ب گشتی وی دەمی گەلێ کورد د چاڤەڕێبوونەکێدا، بێ کو بزانیت سوباهی دێ ل کیڤە بن یان دێ چ ب سەری هێت، سەرەرای ڤان هەمی ئاستەنگا نەساخیا رێبەر و پێشەوایێ مەزنێ گەلێ کورد هاتە سەر . هەر وەکی کۆمەکا مرۆڤان د ناڤ گەمیەکا بێ گەمیڤان د ناڤ دەریایەکی عاسێ بمینن . بەلێ دناڤ ڤان ڕەوش و کاوداناندا پارتی دیموکراتی کوردستان بۆ هەر دوسیەکێ پلانەک دانا، کادر و فەرماندا کۆمکرن،زۆربەیا پەنابەران ئاکنجیکرن، پێداچوونەڤە و هەڵسەنگاندنێن وێرەکانە کرن، سەرکردایەتیەکا کاتی دانا، ئۆرگانێن پارتی و رێکخستنێن نهێنی ئەکتیڤکرن، هێزێن پشمەرگەی رێکخستن و دابەشکرن، ب باوەری بخۆبوون بریار دەرکرن، ب ئێک دەنگی و ئێکرێزی و گیانەکێ شۆڕەشگێری خەتیرا شۆڕەشێ ب ناڤێ گوڵانا پێشکەفتنخواز ل ٢٦ ێ گوڵانا ١٩٧٦ هەلکر .
بەلێ د ڤان کاودانێن هەری دژوار پارتی و بزاڤا رزگاریخوزیا ب رێنمایی یێن نەمر مەلا مستەفایێ بارزانی ب سەرپەرشتیا سەرۆک مەسعود بارزانی و هەماهەنگیا کاک ئدریسێ هەردەم ساخ و سۆزا نشتیمان پەروەریا سەرکردایەتیا کاتی و کادر و پێشمەرگەهان ب درۆشمێ ( یان کوردستان یان نەمان ) هەر زۆر چەندین داستانێن دێ وێنە هاتنە تۆمارکرن و چەندین دەڤەرێن کوردستانێ هاتنە رزگارکرن و چالاکیێن رێکخستنێن پارتایەتی ب نهێنی گەهشتنە سەنتەرێ بریاردانا رژێما بەعسا عەفلەقێ ل بەغدایا پایتەخت . ئەڤ چەندە بوویە جهێ حیبەتیا دوژمن و نەیارا و خۆشترین مزگینیا کورد پەروەرا . دڤێ هەلکەفتێ دا دبێژینە دوست و نەیارێن پارتی،ئەڤەیە هێز و باوەریا پارتی و خەلکێ کوردستانێ، ئەو هێزا هەردەم ل پیلانێن وان یێن نیڤدەولەتی و هێزا زەبەلاحا چەکداری و لەشکری، مەزنتر و بهێزتر . جهێ پسیارێ یە ئەگەر لێزانین و خۆڕاگری و باوەریبوونا پارتی و رێبازا بارزانی نە ب ماف و ئارمانجێن ڕەوا یێن خەلکێ کوردستانێ، کی دا خۆ ل بەر ڤان هەمی پیلانا ڕاگریت و ب هێزەکا مەزنتر و کاریگەرتر سەرهەلدەتەڤە..! ژلایەکێ دیتر جهێ پسیارێ یە ب چ رێژە گەنج و نفشێ نهۆ، بگرە ژمارەکا کادرێن پارتی ژی، نهێنیێن پەرپابوون و سەرکەفتنێن شۆڕەشا گوڵانا پێشکەفتنخواز دزانن . بلا بەرسڤ بۆ خاندەڤانا بیت ..