ههر د بهردهواميیا ديدار و كۆمبوونێن خوەدا ل كۆنفرانسا ئاساييشا ميونشن ل ئهڵمانيا، بەری نیڤرۆیا ئهڤڕۆ شهمبی 2024/2/17 نێچيرڤان بارزانى، سهرۆكێ ههرێما كوردستانێ، ب جودا ل گهڵ گرووپەكێ پهرلهمانتارێن حزبا SPD و گرووپەکێ دی یێ ههردوو حزبێن CDU و CSUیێن ئهڵمانى، پهيوهندييێن ئهڵمانيا ل گهڵ عیراقێ و ههرێما كوردستانێ و ڕەوشا دەڤەرێ گەنگەشەکر.
پهرلهمانتاران دیتن و بۆچوونێن خوە بۆ چەوانییا پێشخستنا پهيوهندييێن ئهڵمانيا ل گهڵ عیراقێ و ب تايبهتى ههرێما كوردستانێ و قۆناغا بهێت یا هاريكاريیێن هەڤپشک د ناڤبەرا واندا د كهرتێن جودادا بەرچاڤکر، ههروهسا سوپاسییا ڕۆڵێ ههرێما كوردستانێ كرن د بهرهنگاربوونا تيرۆرێ و هاریکاریکرنا پێكهاتهیان ب تايبهتی ژی ئێزدييان.
ژلایێ خوەڤە سهرۆك نێچيرڤان بارزانى، سوپاسییا پشتڤانییێن پهرلهمان و حكوومهتێ و گهلێ ئهڵمانيا بۆ ههرێما كوردستانێ كر و ب تايبهتى ئاماژه ب هاریكارییێن ئهڵمانيا بۆ ئێزدييان كر.
ڕەوشا پێكهاتهیان ب گشتى ل ههرێما كوردستانێ، تهوهرەكێ دی یێ کۆمبوونا وان بوو.