مه‌سرور بارزانى سه‌رۆكوه‌زیرێن هه‌رێما كوردستانێ په‌یامه‌ك ل دۆر كۆمبوونا ئه‌ڤرۆ یا دگه‌ل محه‌مه‌د شیاع سوودانى سه‌رۆكوه‌زیرێن عیراقێ ل سه‌ر ئه‌كاونتێ خوه یێ فه‌یسبۆكى به‌لاڤكر، ئه‌ڤه ده‌قێ وێ یه:
ئه‌ڤرۆ دگه‌ل به‌رێز قوباد تاله‌بانى و شاندێ دگه‌ل مندا ژ حكومه‌تا هه‌رێما كوردستانێ، ل به‌غدا دگه‌ل به‌رێز محه‌مه‌د شیاع سوودانى سه‌رۆكوه‌زیرێن عیراقێ كۆمبووین، دكۆمبوونێدا من دووپاتى ل چاره‌سه‌ركرنا ئاریشه‌یان ل سه‌ر بنه‌مایێن ده‌ستوورى و رێككه‌ڤتنان كر.
من دووپاتكر، شایسته‌یێن داراییێن هه‌رێما كوردستانێ و مووچه‌یێ فه‌رمانبه‌ران تێكه‌لى هه‌ڤركییێن سیاسى نه‌هێنه‌كرن، پێدڤییه ب زووترین ده‌م ئه‌و ئاریشه‌یه بهێته چاره‌سه‌ركرن و مووچه‌خۆرێن هه‌رێما كوردستانێ ئێدى بۆ وه‌رگرتنا مافێن خوه د چاڤه‌رێبوونێدا نه‌بن، هه‌روه‌سا مه ل بیرا هه‌موو لایه‌نان ئینا، حكومه‌تا هه‌رێما كوردستانێ پابه‌ندییێن خوه بجهئیناینه و مه هه‌مان چاڤه‌رێ ژ حكومه‌تا فیدرالییا عیراقێ هه‌یه.
به‌رێز سوودانى ژى ئاماده‌ییا خوه بۆ چاره‌سه‌ركرنا ئاریشه‌یان ل سه‌ر بنه‌مایێن ده‌ستوورى و قانوونان نیشاندا و دووپاتى ل هندێ ژى كر، كو هه‌موو لایه‌ك بزاڤێ بۆ دابینكرنا پشته‌ڤانییا سیاسى ژ پێخه‌مه‌ت دیتنا زووترین چاره‌سه‌رییان بۆ هه‌موو ئاریشه‌یان بكه‌ت.
ب باوه‌رییا مه عیراق خۆدان سه‌رمایه‌كێ مه‌زنێ مرۆڤی و سرۆشتییه و ب ره‌خساندنا سه‌قایه‌كێ باش و ب رێڤه‌برنه‌كا باش، هه‌موو عیراق دێ به‌ره‌ڤ قووناغه‌كا پێشكه‌ڤتى تر و گه‌شتر پێنگاڤان هاڤێت.