ئاکرێ نیوز
ل درێژاهیا سەرەدانێن خۆ دا ژبۆ دەڤەرێن بادینان و کۆمبوونێن دگەڵ جەماوەری یێن ڤێ دەڤەرێ ئەڤرو رۆژا چوارشەمبی 23یێ ئابا 2023 سەرۆک مەسعود بارزانی سەرەدانا قەزا شێخان دا و دگەڵ چین وتوێژێن وێ دەڤەرێ کومبوو.
د کومبوونێ دا سەرۆک بارزانی ئارمانجا سەرەدانێ بۆ دەڤەرێ رۆهنکر سەرباری ئاماژەدان ب پابەندبوونا خەلکێ دەڤەرێ ب فەرهەنگا پێکڤەژیانێ و داخوازکر کو رێک نەهێتەدان هیچ کەسەک و لایەنەکێ نامۆ و لادەر ڤێ فەرهەنگا زەنگین تێک بدەت.
سەرۆک بارزانی ئاماژە ب رەوشا ناڤخوویێ هەرێما کوردستانێ و پەیوەندیێن هەرێما کوردستانێ دا و راگەهاند کو هەموو بزاڤەکێ دێ کەین ژ پێخەمەت رەوشا ناڤخوو بهێتە چارەسەرکرن و هەمی لایەک لسەر ستراتیژیا نەتەوەیی و نیشتیمانی ڕێک بکەڤن. ئەڤ چەندە ژی ئێخستە بەرچاڤ کو حکومەتا نوکە یا عیراقێ لسەر بنەمایێ رێکەڤتنەکا گشتی و پابەندیا شەراکەت و هەڤسەنگی و رێکەڤتنێ هاتییە دامەزراندن لێ بەلێ جهێ داخێ یە ئەڤ بنەمایە پشتگوهـ خستینە ، و لدویڤ سەرەدانا شاندێ بلندێ پارتی بۆ بەغدا ئەو چەند دهێتە چاڤەرێکرن کو کێشە بهێنە چارەسەرکرن.
ل درێژاهیا گوتنێن خودا سەرۆک بارزانی بەحسی پێتڤی یا هەرێما کوردستانێ کر کو پشت بەستنێ ب ژێدەر و بەرهەمێ خۆ ببەستیت و ژبۆ ڤێ مەرەمێ کابینا نەهێ یا حکومەتا هەرێمێ بەرنامە و پلانێن باش ئەنجامداینە و ئەنجامێ وێ ژی یێ دیارە.
هەر د گوتارا خۆ دا سەرۆک بارزانی بەحسی مەترسیێن لهەمبەر کوردستانێ کڕن و داخوازکر کو هەمی لایەک پێکڤە هاریکاربن ژبۆ موکمکرنا هەستێ نیشتیمان پەروەری و هوشیارکرنا خەلکی ژبۆ بەرەنگاربوونا وی تەوژمێ کو ئاراستەیا جڤاکی و گەنجێن مە دکەتە ئارمانج .