رۆژنامه‌یا موندۆ دێپۆرتیڤۆ یا ئسپانى ئه‌ڤرۆ ئێكشه‌مبیێ به‌لاڤكریه؛ یانه‌یا به‌رشلۆنا ڤه‌گوهاستنا ڤیتۆر رۆكى هێرشبه‌رێ به‌رازیلى بۆ دناڤ رێزێن خۆ دا ئێكلاكر.
ل دۆر بهایێ هه‌ڤبه‌ستێ دیاركریه كو یانه‌یا ئسپانى دێ 35 ملیۆن یۆرۆیان وه‌ك بهایه‌كێ ڤه‌بر ده‌ته یانه‌یا به‌رازیلى زێده‌بارى 10 ملیۆن یۆرۆیێن دى وه‌ك زێده‌كرن.
یانه‌یا به‌رشلۆنا ژ به‌ر ره‌وشا دارایى یا نوكه یا یانه‌یێ، دێ پاره‌یێن هه‌ڤبه‌ستێ د درێژیا 3 سالان دا ده‌ته یانه‌یا به‌رازیلى.
هێرشبه‌رێ به‌رازیلى یێ 18 سالى دێ گرێبه‌سته‌كێ بۆ ده‌مێ 5 سالان ل گه‌ل به‌رشلۆنا ئیمزا كه‌ت.
ده‌مه‌ك بوو به‌رشلۆنا د مێركاتۆیێ دا ل هێرشبه‌ره‌كێ دگه‌ڕیا، چاڤى هێرناندێز راهێنه‌رێ یانه‌یێ ژى ژ به‌رى نوكه دیاركربوو كو یانه‌یێ پێدڤى ب كڕینا شه‌ش یاریكه‌ران هه‌یه دا كو ئاستێ جاران بزڤڕینیت.