سه‌رۆكێ حكومه‌تا هه‌رێما كوردستانێ و رێكخه‌رێ كاروبارێن بالیۆزخانه‌یا هۆله‌ندا كۆمبوون، په‌یوه‌ندیێن دو ئالى و دوماهى پێشهات و گوهۆڕینێن ئیراقێ و ناوچێ به‌حسكرن.
ئه‌ڤرۆ دوشه‌مبێ 1-9-2025ێ مه‌سروور بارزانى، سه‌رۆكێ حكومه‌تا هه‌رێما كوردستانێ ل گه‌ل كریستۆف پرۆمێرشبێرگه‌ر، رێكخه‌رێ كاروبارێن بالیۆزخانه‌یا هۆله‌ندا كۆمبوون، گوهۆڕین و پێشهاتێن ناوچێ و به‌حسكرن، هه‌ڤده‌م د كۆمبوونێ دا ئه‌دریان ئایسلستین، كونسلێ گشتى یێ هۆله‌ندا ل هه‌رێما كوردستانێ ژى ئاماده‌یى كۆمبوونێ ببوون.
ژ ئالییێ خۆ ڤه سه‌رۆكێ حكومه‌تا هه‌رێما كوردستانێ سوپاسییا هۆله‌ندا كر بۆ پشته‌ڤانیكرن د چاكسازیێن حكومه‌تێ دا د وارێ هه‌مه‌جۆریا ئابۆرى ب تایبه‌ت پشته‌ڤانیكرنا كه‌رتێ چاندنێ ل هه‌رێما كوردستانێ.
رێكخه‌رێ كاروبارێن بالیۆزخانه‌یا هۆله‌ندا به‌حس ل پێشكه‌فتن، ئاڤه‌دانى و ره‌وشا پێكڤه‌ژیانا ئاشتیانه ل هه‌رێما كوردستانێ كر كو هه‌رده‌م مێڤاندارییا ئاواره و په‌نابه‌ران كریه.
هه‌روه‌سا ئاماده‌ییا وه‌لاتێ خۆ بۆ زێده‌تر پێشخستنا په‌یوه‌ندیێن ل گه‌ل هه‌رێما كوردستانێ دیاركر و بۆ ڤێ مه‌ره‌مێ ژى بڕیاره د ده‌مێ بهێت دا شانده‌كێ بازرگانى یێ هۆله‌ندى ب مه‌ره‌ما گه‌شه‌پێدانا په‌یوه‌ندییێن بازرگانى و ئابۆرى سه‌ردانا هه‌رێمێ بكه‌ت.
د پشكه‌كا دى یا كۆمبوونێ دا دیتن ده‌رباره‌یى بزاڤێن چاره‌كرنا پێكئینانا كابینه‌یا نوى یا حكومه‌تا هه‌رێما كوردستانێ و چاره‌كرنا كێشه‌یێن ناڤبه‌را هه‌رێم و حكومه‌تا فیدرالى و دابینكرنا مافێن ده‌ستوورى و درایى یێن خه‌لكێ كوردستانێ ل هه‌ڤگوهارتن.