ئاکرێ نیوز
د رێورەسمەکا مەزن دا ل شانۆیا شاتلێت ل پاریس، هێرشبەرێ فرەنسی و یانەیا پاریس سانجێرمان، عوسمان دێمبێلی، شیا خەلاتێ بالۆن دۆر یا سالا ٢٠٢٥ ب دەستڤە بینیت و بوو باشترین یاریزانێ جیهانێ. ئەڤە جارا ئێکێ یە د مێژوویا خوە یا وەرزشی دا دێمبێلی ڤی خەلاتێ ب دەستڤە بینیت.
سەرکەفتنا دێمبێلی پشتی وەرزەکێ زێرین دهێت دگەل یانەیا خوە پاریس سانجێرمان، کو تێدا شیا ناسناڤێ خولا یانەیێن پاڵەوانێن ئەوروپا (شامپیۆنزلیگ) بۆ جارا ئێکێ د مێژوویا یانەیێ دا ب دەستڤە بینیت. هەروەسا، وی رۆلەکێ سەرەکی هەبوو د برنا هەردوو ناسناڤێن نافخۆیی دا، خولا فرەنسی (لیگ ١) و کاسا فرانسایێ، دگەل کاسا سوپەرا ئەوروپا.
دێمبێلیێ ٢٨ سالی، کو وەرزێ بوری ب باشترین وەرزێ ژیانا خوە یا وەرزشی دەرباس کر، ژلایێ ئەفسانەیێ بەرازیلی، رۆنالدینیوی، ڤە هاتە خەلات کرن. د دەنگدانێ دا، دێمبێلی ل پێشیا یاریزانێ گەنج و بەهرەمەندێ یانەیا بەرشەلۆنا، لامين يامال، هات کو پلا دویێ ب دەستڤە ئینا.
ب ڤێ سەرکەفتنێ، عوسمان دێمبێلی دبیتە ئێکەم یاریزانێ فرەنسی کو بشێت خەلاتێ بالۆن دۆر ب دەستڤە بینیت دەمێ یاریێ بۆ یانەیا پاریس سانجێرمان دکەت. هەژی گۆتنێ یە کو راهێنەرێ وی، لویس ئێنریکێ، خەلاتێ باشترین راهێنەرێ سالێ وەرگرت و یانەیا پاریس سانجێرمان ژی وەک باشترین یانەیا سالێ هاتە دەستنیشانکرن.
د وەرزێ ٢٠٢٤-٢٠٢٥ دا، دێمبێلی شیا د هەمی هەڤریکیا دا ٣٥ گۆلان تۆمار بکەت و ١٦ ئاسیستان ژی ئەنجام بدەت.