راکان جبووری پارێزگارێ بەرێ یێ کەرکووکێ و حەیدەر مەلا سەرکردەیێ هەڤپەیمانییا عەزم ژ هەڤرکییا هەلبژارتنان هاتن دویرئێخستن.
بریارە ل 11-11-2025ێ هەلبژارتنێن خۆلا شەشێ یا جڤاتا نوونەرێن ئیراقێ بهێنە کرن، د چارچووڤەیێ رێکارێن بەری هەلبژارتنان دا، کۆمسیۆنا بلند یا سەربەخۆ یا هەلبژارتنان تا نوکە ژمارەیەکا مەزن یا کاندیدان ب ئەگەرێن جودا-جودا ژ هەڤرکیییێ دویرئێخستینە.
ل گۆرەی مەدیا ئیراقی کۆمسیۆنێ هەر ئێک ژ راکان جبووری، سەرۆکێ هەڤپەیمانییا ئەرەبی ل کەرکووکێ و پارێزگارێ بەرێ یێ کەرکووکێ ل گەل حەیدەر مەلا، سەرکردەیێ هەڤپەیمانییا عەزم ژ هەڤرکییێ هەلبژارتنێن بهێن دا دویرئێخستن.
مەدیا ئیراقی ئەگەرێن سەرەکی یێن دویرئێخستنا راکان جبووری و حەیدەر مەلا ئاشکرا نەکرن و ژ ئالییێ خۆ ڤە تا نوکە کۆمسیۆنا سەربەخۆ یا هەلبژارتنان چ لێدوان و راگەهاندنێن فەرمی دەربارەی بابەتی نەداینە و بەلاڤنەکرینە.