بەربژارەکێ هەلبژارتنێن پەرلەمانێ ئیراقێ ب تۆمەتا سەردابرنا دەنگدەران هاتە گرتن، وی بەربژاری سۆزا دامەزراندنێ دابوو خەلکی.
ل گۆرەی راگەهاندنەکا جڤاتا بلند یا داداوەرییا ئیراقێ، کو ئەڤرۆ رۆژا سێشەمبی، 26-8-2025ێ بەلاڤکریە، ئەو بەربژارە ب فەرمانا دادگەها لێکۆلینێ کەرخ یا دویێ ل بەغدا هاتییە گرتن.
دادگەهێ راگەهاندییە:" ئێک ژ بەربژارێن هەلبژارتنێن پەرلەمانی مە دەستەسەرکر، پشتی کو دەنگدەر سەردابرین و فێل لێکرین ب رێیا دانا سۆزا دامەزراندنێ ب وان ل سازیێن حکومی و دانا قەر و مووچەیان ل فەرمانگەهێن چاڤدێرییا جڤاکی، بەرامبەر وێ یەکێ کو دەنگێ خۆ بدەنێ".
ل گۆرەی دادگەهێ: کۆمسیۆن لسەر دۆسیەیا وی بەربژاری هاتییە ئاگەهدارکرن ب مەرەما دویرئێخستنا وی ژ بەربژاربوونێ بێی کو ناڤێ وی بهێتە بەلاڤکرن.
ل گۆرەی زانیارییان، تا نوکە زێدەتری 627 بەربژاران هەلبژارتنێن پەرلەمانێ ئیراقێ ب ئەگەرێن جودا-جودا هاتینە دویرئێخستن، 15 ژ وان ب بریارا جڤاتا دادوەرییا بلند بوون.