ئاکرێ نیوز
پاشەرۆژا ستێرا گەنج یا یانەیا بەرشەلۆنا، فیرمین لۆپیز، بوویە جهێ گەنگەشە و دانوستاندنان د بازاڕا ڤەگوهاستنا یاریزانان دا. لۆپیز، کو د وەررزێ بوری دا ئاستەکێ گەلەک بلند پێشکێش کر و بوو ئێک ژ یاریزانێن سەرەکی یێن هێلا ناڤین یا بلوگرانا، نها بوویە ئارمانجا سەرەکیا چەندین یانەیێن مەزن یێن ئنگلتەرا.
ل گۆرەیی ژێدەرێن نووچەیان، یانەیا چێلسی یا لەندەنی ب شێوەیەکێ گەلەک جدی داخوازا ڤەگوهاستنا ڤی یاریزانێ ئیسپانی دکەت و ئامادەیە کو پارەکێ مەزن بۆ بدەت. هەروەسا، ناڤێ یانەیا مانچستەر یونایتد ژی وەک ئێک ژ وان یانەیان دهێت کو ب دیقەت چاڤدێریا ڕەوشا وی دکەت.
ل ئالیێ دی، کارگێریا یانەیا بەرشەلۆنا و ڕاهێنەرێ نوی هانزی فلیک، ب ساناهی دەستبەرداری فیرمین لۆپیز نابیت. فلیک دبینیت کو لۆپیز دێ ئێک ژ ستوینێن سەرەکی بیت د پلانێن وی یێن پاشەرۆژێ دا. لێ دگەل وێ چەندێ ژی، ڕەوشا ئابووری یا خراب یا بەرشەلۆنا دبیت کو کارگێریێ نەچار بکەت کو ڕازی ب فرۆتنا وی ببیت، ب تایبەت هەگەر ئۆفەرەک بهێت کو بهایێ وێ بگەهیتە 70 ملیۆن یۆرۆیان.
هەیا نوکە، یاریزان ب خوە دلخوەشیا خوە ل یانەیا کەتەلۆنی دیار کریە و بەرشەلۆنا وەک "یانەیا خەونێن خوە" دبینیت. لێ فشارێن بازاڕێ و ئۆفەرێن مەزن دشێن هەر بڕیارەکێ بگوهۆرن.
چاڤەرێ دهێتە کرن کو د ڕۆژێن بهێت دا، چارەنڤیسێ فیرمین لۆپیز دێ پتر ئاشکرا بیت. ئەرێ دێ ل کامپ نۆ مینیت و پڕۆژێ هانزی فلیک بجهـ ئینیت، یان ژی دێ بەرەڤ ستامفۆرد بریج یان ئۆلد ترافۆرد چیت و ئەزموونەکا نوی ل پرێمەرلیگێ دەستپێکەت؟ بەرسڤا ڤێ پرسیارێ دێ لسەر مێزا دانوستاندنان و د دەستێ یاریزانی ب خۆ دا بیت.