مالپەرێ بەغداد ئەلیەوم راگەهاند؛ جڤاتا وەزیران دێ ل رۆژا ئێکشەمبی بڕیارێ ل دۆر مووچەیێ مەها خزیرانێ دەت، پشتی رێککەفتنا دناڤبەرا وەزارەتا سامانێن سروشتی و وەزارەتا پەترۆلێ یا ئیراقێ، پەترۆل بوویە پشکا کۆمپانییا سۆمۆ.
چارشەمبییێ 13ێ تەباخا 2025ێ، مالپەرێ بەغداد ئەلیەوم ژ زارێ ژێدەرەکێ حکومەتا فیدرال راگەهاند؛ پشتی هەرێما کوردستانێ 120 ملیار دیناران ژ داهاتێ ناڤخۆ بۆ بەغدا دهنێریت، جڤاتا وەزیرێن ئیراقێ ل روینشتنا رۆژا ئێکشەمبی، دێ بڕیارا خەرجکرنا ئێکسەر یا مووچەیێ مووچەخۆرێن هەرێما کوردستانێ یێ مەها خزیرانێ دەت.
دیارکر ژی؛ پشتی رێککەفتنا تەمام یا دناڤبەرا وەزارەتا سامانێن سروشتی یا هەرێما کوردستانێ و وەزارەتا پەترۆلێ یا ئیراقێ و ئیمزاکرنا رێککەفتنێ، پەترۆلا هەرێمێ بوویە پشکا کۆمپانییا بازارکرنا پەترۆلا ئیراقێ (سۆمۆ).
بەغداد ئەلیەوم هەروەسان گۆت ژی: دەما دەستپێکرنا هنارتنا پەترۆلێ د ستۆیێ بەغدایێ دا یە و ل دویڤ وێ چەندێ دمینیت کا ب چو رەنگ دێ ل گەل ئالییێ تورکیا گەهیتە رێککەفتنێ.
ئەڤە د دەمەکی دا یە، ئەڤرۆ وەزارەتا سامانێن سروشتی یا حکومەتا هەرێما کوردستانێ د بەیانەکێ دا راگەهاند؛ ل گەل وەزارەتا پەترۆلێ یا ئیراقێ ل سەر هنارتنا پەترۆلا هەرێما کوردستانێ رێککەفتینە.
دیارکر ژی؛ ل گۆرەیی بەرهەمێ رۆژانە پشتی کو 50 هزار بەرمیل بۆ بکارئینانا پێدڤیاتییێن ناڤخۆ یێن هەرێمێ دهێنە بکارئینان، دێ پەترۆلا مایی رادەستی کۆمپانییا بازارکرنا پەترۆلا ئیراقێ (سۆمۆ) هێتە کرن.