د.فوئاد حسێن وه‌زیرێ ده‌رڤه یێ عیراقێ د داخۆیانییێن ڕۆژنامه‌ڤانیدا ڕاگه‌هاند، ئاریشه‌یا مووچه‌یێ هه‌یڤا پێنج ب هه‌ماهه‌نگى و هاریكارییا هه‌موو لایه‌نان هاته چاره‌سه‌ركرن، مووچه‌یێ هه‌یڤێن شه‌ش و حه‌فت ژى چ ئاریشه تێدا نابن و دێ هێته خه‌رجكرن، دڤێت هه‌رێما كوردستانێ و عیراق پابه‌ندى ڕێككه‌ڤتنێ بن، داكو ئاریشه‌یا مووچه‌ى ب تمامى بهێته چاره‌سه‌ركرن.
هه‌روه‌سا دیاركر، ل دووڤ ڕێككه‌ڤتنێ ڕۆژانه 50 هزار به‌رمیلێن په‌ترۆلا هه‌رێما كوردستانێ دێ بۆ پێدڤییا ناڤخۆ هێنه ته‌رخانكرن، 31 هزار به‌رمیل ژى ڕاده‌ستى حكومه‌تا عیراقێ هێنه‌كرن، دنوكه‌دا هه‌رێما كوردستانێ كار ل سه‌ر چاككرنا وان زه‌ڤییێن په‌ترۆلێ دكه‌ت، یێن كه‌ڤتینه به‌ر هێرشێن درۆنى.
وه‌زیرێ ده‌رڤه یێ عیراقێ ئاماژه ب هندێ دا، سێ لژنه‌یێن هه‌ڤپشك هاتینه پێكئینان هه‌ر ئێك دێ كاره‌كێ جۆدا كه‌ت، لژنه‌یه‌ك دێ هه‌لسه‌نگاندنێ بۆ داهاتێ ناڤخۆ یێ هه‌رێمێ كه‌ت، لژنه‌یه‌ك دێ دووڤچوونا هنارتنا په‌ترۆلێ كه‌ت، لژنه‌یا دیژى دێ پشكنینێ بۆ پشكا هه‌رێما د مووچه‌یدا كه‌ت.