سەرۆک نێچیرڤان بارزانى د پەیامەکێ دا سوپاسییا سەرۆکێ ئیماراتێ کر و راگەهاند؛ ب ناڤێ خۆ و گەلێ کوردستانێ سوپاسییا هەوە دکەم بۆ وێ چارەسەرییا هەوە پێشکێشی کەریم شنگالی کری.
نێچیرڤان بارزانى، سەرۆکێ هەرێما کوردستانێ، ئەڤرۆ، چارشەمبییێ، 11-6-2025، د پەیامەکێ دا سوپاسییا شێخ محەمەد بن زاید ئەل نەهیان، سەرۆکێ ئیماراتێ کر و راگەهاند؛ ب ناڤێ خۆ و گەلێ کوردستانێ سوپاسییا هەوە دکەم بۆ وێ چارەسەری، گرێنگیپێدان و چاڤدێرییا ل ڤێ دویماهییێ د دەمێ چارەسەرییێ دا ل ئەبوزەبی هەوە پێشکێشی کەریم شنگالی کری.
دیارکر ژی؛ شنگالی ل دەمێ مانا د نەخۆشخانەیێ ڤە، خزمەتەما نۆشداری یا گەلەک باش، مامەلەیەکا مرۆڤانە و جوامێرانە ژ ئالییێن پەیوەندیدار ڤە بۆ وی هاتە پێشکێشکرن و هەمی بزاڤ هاتنە کرن بۆ هندێ ب باشترین شێوە چاڤدێرییا وی بهێتە کرن و ئەڤە ژی جهێ سوپاسییێ یە.
گۆت ژی: سوپاس بۆ هەلویستێ هەوە یێ بلند یێ برایینی بۆ ئەرکێ ڤەگەراندنا تەرمێ شنگالی بۆ نیشتیمانێ وی، ئەڤە ژی نیشانەکا راستەقینەیە بۆ پەیوەندییا موکۆم و برایینی یا گەلێ کوردستانێ و دەولەتا ئیماراتێ ب سەرکردایەتی و گەلێ هەردو ئالییان. ڤی هەلویستێ هەوە یێ مرۆڤی و جوامێرانە بلند قەلەم ددەین و بۆ هەمی دەمان دێ جهێ سوپاسییێ بیت بۆ گەل و سەرکردایەتییا کوردستانێ.
ئاشکراکر ژی؛ د هەمان دەم دا سوپاسییێن خۆ بۆ پشتەڤانییا ئیماراتێ دوپاتدکەین یاکو ب گشتی پێشکێشی هەرێما کوردستانێ و ئیراقێ دکەت. ئەڤ پشتەڤانییا راستگۆیانە، موکۆمییا پەیوەندییا دۆستایەتی و برایینی یا دناڤبەرا هەدو ئالییان دا نیشان ددەت.