كۆمیتەیا ناڤەندا یا پارتی دیمۆكراتی كوردستان راگەهاند؛ ب لێبووین ڤە پشتی بۆرینا چەندین سالان ژ کەفتنا رژێما بەعس، پشکەکا دەستهەلاتدارێن بەغدا ب عەقلیەتەکا دویر ژ فیدرالییێ و ڤەگەریان بۆ دەولەتا مەرکەزی هزردکەن.
كۆمیتەیا ناڤەندا یا پارتی دیمۆكراتی كوردستان، ئەڤرۆ، دوشەمبییێ، 2025-6-2، د بەیانەکێ دا راگەهاند؛ ب لێبووین ڤە پشتی بۆرینا چەندین سالان ژ کەفتنا رژێما بەعس، پشکەکا دەستهەلاتدارێن بەغدا ب عەقلیەتەکا دویر ژ فیدرالییێ و ئاراستەیێ ڤەگەریان بۆ دەولەتا مەرکەزی و پشتگوههاڤێتنا دەستووری هزردکەن.
دیارکر ژی؛ سەرکردایەتییا کوردستانێ ب بڕیار پەرلەمانێ کوردستانێ پشکداری د دانانا ئیراقا نوی ل سەر بنەمایێ هەڤپشکی، سازان و هەڤسەنگییێ داکر، برێڤەبرنا ئیراقێ ژ ئالییێ هەمی پێکهاتەیان ڤە ل گۆرەیی دەستوورێ هەردەمی یێ ئیراقێ و دابینکرنا ژیانەکا ژ هەژی بۆ هەمی خەلکێ ئیراقێ کو ببیتە ئەگەرێ قەرەبۆکرنا هەمی وان کەسان یێن دەردەسەری و نەهامەتی ب سەری هاتین.
گۆت ژی؛ هەلوەستێ حزبێن کوردستانی ل کۆمبوونا هەڤپشک یا رۆژا 31ێ گولانێ بلند قەلەم ددەین و ئەم ژی داکۆکییێ ل چارەکرنا کێشەیان دکەین و دویماهی ب ڤان رەفتارێن نەدادپەروەرانە بهێتە کرن یێن ل گەل ژیارا فەرمانبەر و مووچەخۆرێن هەرێمێ دهێتە کرن.
ئەوژی گۆت: بزاڤێن رێکخستن و بهێزکرنا ناڤمالا کوردی هاتینە دان و بزاڤێن جددی بۆ دروستکرنا هەڤپەیمانییەکا کوردستانی بۆ پشکداریکرنا هەلبژارتنێن جڤاتا نوینەرێن ئیراقێ بۆ خۆلا شەشێ هاتینەکرن لێ ب مخابنی ڤە پێشوازی ل وان بزاڤان نەهاتییەکرن.
گۆت ژی: پترییا حزب و ئالییان د کۆمبوونێ دا د بەرهەڤبوون و چەند ئالییەکان ژی دەستپێشخەرییا مە قەبویل نەکر و ئارمانجا مە سەبارەت ماف و شایستەیێن دارایی یێن هەرێما کوردستانێ، شیرەتکرن و لێکگوهارتنا هزر و بیران بوون.
ئەوژی دیارکر؛ ناڤەرۆکا سەرەدانا سەرۆکوەزیر مەسروور بارزانی بۆ ئەمریکا هاتە رۆنکرن کو ل گەل چەندین کەسێن وی وەلاتی روینشت و رێککەفتنێن وان ل دۆر وزە و پترۆلێ کرین.
ئاماژە ب هندێ ژی کر؛ دانوستاندن ل دۆر پرۆسەیا پێکئینانا کابینەیا دەهێ یا حکومەتا هەرێما کوردستانێ هاتەکرن.
ئەوژی گۆت؛ بەحس پرۆسەیا هەلبژارتنێن خۆلا شەشێ یێن جڤاتا نوینەرێن ئیراقێ هاتەکرن و پلان و بەرنامەیێن بهێن یێن ئۆرگانێن مە سەبارەت پرۆسەیا ناڤبری هاتنە ڤەخواندن.
بریارە ل 2025-11-11 هەلبژارتنێن پەرلەمانێ ئیراقێ بهێنە برێڤەبرن و دهێتە چاڤەرێکرن نێزیکی 30 ملیۆن ئیراقییان مافێ دەنگدانێ هەبیت.