نورا جەعفەر
ئەگەر چاڤ خشاندنەکا کورت د هند وێستگەهێن دیرۆکا کوردان دا بکەین نەخاسم وەکو نڤشێ پشتی سەرهەلدانا گەلێ مە ل سالا 1991ێ دبینین هەردەما هێز و ئالیێن سیاسی یێن کوردا ئێک هەلویست و ئێک رەنگ و ئێک دەست بووینە سەرکەفتێن دیرۆکی تومارکرینە.
ل سەرهەلدانا پیرۆزا گەلێ مە ل سالا 1991ێ هەمی ئالیێن سیاسی یێن کوردان لبن چەترا بەرەیی کوردستانی دا ئێکگرتی بوون دژبەریا رژێما بەعسا دیکتاتور سەرهەلدانا جەماوەری ئەنجامدا ب پسکداریا هەمی تەخ و چینێن جڤاکی بۆ ئەگەرێ بدەست خستنا دەستکەفت و دامەزراندنا پەرلەمان و حکومەتا هەرێما کوردستانێ و دروست بوونا قەوارێ هەرێمێ.
پشتی سەرهەلدانێ ژی دەمێ ل سالا 2009 لدەمێ هردوو پارتێن سەرەکی یێن هەرێما کوردستانێ پارتی دیموکراتی کوردستان و ئێکەتیا نشتیمانیا کوردستانێ هەڤپەیمانی پێک ئانی لژێر دروشم و ناڤ و نیشانێ هەڤپەیمانی یا کوردستانی ل هەردوو هەلبژارتنێن پەرلەمانێ کوردستانێ و هەلبژارتنێن جڤاتا نوێنەرێن عیراقا فیدرال پشکداربوون ب هەڤپەیمانی دەستکەفت و سەرکەفتنێن خۆ هەبوون.
دیسان لدەمێ جەنگێ دژی تیرورستێن داعش دا ل سالا 2014 _ 2017 لدەمێ دناڤا پەرلەمانێ کوردستانێ دا هەمی لایەنێن کوردستانی ب ئێگ دەنگ رەزامەندی لسەر داخوازا سەرۆکێ هەرێما کوردستانێ دای کو هێزێن پێشمەرگەی پشکداربن ل رزگارکرنا باژێرێ کوبانێ لژێر دەستێ تیرورستێن داعش بوو ئەگەرێ سەرکەفتن و دلخوشیا هەمی کوردان ل هەر قولاچکەکا جیهانێ کو ڤێ هێزا پێشمەرگێن قارەمانێن کوردستانێ سنوورێ هەرسێ وەلاتان بری ژ عیراق و تورکیا و سوریا ژبۆ رزگارکرنا باژێرێ کوبانێ .
هەروەها ل سالا 2017 دەمێ هەمی هێز و ئالیێن سیاسی یێن کوردی ژبلی نەوەی نوێ پشکداری کری ل گشت پرسیا ریفراندوما سەربخوویا کوردستانێ ئەنجامەکێ ئەرێنی و گرنگ و دیرۆکی تومارکر ئەو ژی گەلێ کورد بریارا خۆ دا و ب رێژا پتری 92% ژ خەلکێ هەرێما کوردستنێ ب بەلێ دەنگێ خۆ دا ژبۆ سەربخوویا کوردستانێ ب سەرپەرشتی رێبەریا سەرۆک مەسعود بارزانی .
دنهادا کوردستان یا دبارودوخەکێ هەستیاردا دەرباز دبیت ، کو مە دووبارە هەڤرکیە دگەل وێ دەولەتێ کو بویە ئەگەرێ دروست بونا مێژوویەکا خویناوی ژبو مللەتێ کورد، لەوما یا رەوا ئەوە دووبارە هەمو پارتێن سیاسی ئێك دەنگ و هەروها ئێك هەلویست بن بەرامبەر سیاسەتا نە دادپەروەرانە یا دەولەتا عیراقێ بەرامبەر حکومەتا هەرێما کوردستانێ کو بودجە و موچە لسەر هەرێما کوردستانێ برییە و ب فەرمی وەزارەتا داریی یا عیراقێ راگەهاندییە کو 8 مووچێن هەرێمێ یێن سالا 2025 رەوانە نەکەت کو ئەڤ چەندە دژی دەستور و بریارێن دادگەها فیدرالی یە .
و ئاشکرا و خویایە شەرێ هەرێما کوردستانێ و حکومەتا عیراقێ دنهادا شەرێ کەرامەت و مانێ یە ، لەوما دبێژم دەم دەمێ ئێکگرتنێ یە دەمێ ئێك دەنگیێ یە ، دەمێ ئێک هەلویستیێ یە نە دەمێ تومەتبارکرنا هەڤدو خیانەتکرنێ یە، بلا ئەم پەندا ل رابردوویێ خۆ وەربگرین هوزانڤانێ مەزنێ کورد جگەر خوین دبێژیت:"( کوردینو ببن یێك ئەگەر نە هونێ هەرن یئك ب یێك ) .