سەرۆک نێچیرڤان بارزانى ئەڤرۆ، ل هەولێرێ پێشوازی ل کونسۆلێ گشتی یێ قەتەرێ ل هەرێمێ کر. سەرۆک نێچیرڤان بارزانى ب فەرمی بۆ پشکداریکرن د کارێن کۆربەندێ دەوحە دا ل وی وەلاتی هاتە داخوازکرن.
نێچیرڤان بارزانى، سەرۆکێ هەرێما کوردستانێ، ئەڤرۆ، چارشەمبییێ، 2025-5-7، ل هەولێرێ پێشوازی ل حسێن بن عه‌لى ئه‌لفه‌زاله، کونسۆلێ گشتی یێ قەتەرێ ل هەرێما کوردستانێ کر. سەرۆکایەتییا هەرێمێ راگەهاند؛ ئه‌لفه‌زالەیی، د دیدارێ دا داخوازنامەیا فەرمی یا محه‌مه‌د بن عه‌بدولره‌حمان ئال سانى، سەرۆکوەزیرێ قەتەرێ، بۆ پشکداریکرن د کارێن کۆربەندێ دەوحە دا ل وی وەلاتی گەهاندە دەستێ سەرۆک نێچیرڤان بارزانى.
گۆت ژی؛ بریارە کۆربەند ل کانوونا ئێکێ یا ئەڤ سالە، ب چاڤدێرییا شێخ ته‌ميم بن حه‌مه‌د ئال سانى، ميرێ قه‌ته‌ر، بهێتە برێڤەبرن.
ئەوژی دیارکر؛ سەرۆک نێچیرڤان بارزانی سوپاسییا خۆ بۆ داخوازنامەیێ دەربری و بەرهەڤییا خۆ بۆ پشکداریکرن د کۆربەندێ ناڤبری دا نیشان دا. هەروەسا دوپاتی ل خواستا هەرێمی بۆ پێشڤەبرنا پەیوەندی و بەرفرەهکرنا هاریکارییێن هەڤپشک ل گەل قەتەرێ کر.
ئاماژە ب هندێ ژی دا؛ ژ ئالییێ خۆ ڤە شاندێ مێهڤان دوپاتی ل گرنگیدانا وەلاتێ وان ب هەرێما کوردستانێ و ئیراقێ کر. ئەو دخوازن د هەمی بواران دا ئاستێ پەیوەندییان باشتر لێ بکەن. هەڤدەم هەردو ئالییان بەحسی دەلیڤەیێن کاری و وەبەرهێنانا قەتەری ل هەرێما کوردستانێ کر