سه‌رۆك بارزانى ل گه‌ل بالیۆز ماهر ئه‌لكه‌ركى كونسلێ گشتى یێ نوى یێ فه‌لستینی ل هه‌ولێرێ كۆمبوو، پێشهاتێن فه‌له‌ستینێ ژ مژارێن كۆمبوونێ بوون.
د دیدارێ دا كونسلێ گشتى یێ فه‌له‌ستینێ زێده‌بارى ئاماژه دان ب په‌یوه‌ندیێن دیرۆكى یێن ناڤبه‌را گه‌لێ كوردستانێ و گه‌لێ فه‌له‌ستین، سلاڤێن مه‌حموود عه‌باس، سه‌رۆكێ فه‌له‌ستینى و سه‌ركردایه‌تی و گه‌لێ فه‌له‌ستینێ ب سه‌رۆك بارزانى گه‌هاندن و دوپاتى ل گرنگییا به‌رده‌ومیدان و گه‌شه‌كرنا په‌یوه‌ندى و دۆستایه‌تییا ناڤبه‌را هه ردو ئالییان هاته‌كرن.
هه‌ر د دیدارێ دا سه‌رۆك بارزانى رۆناهى دا سه‌ر په‌یوه‌ندیێن ناڤبه‌را گه‌لێ كوردستانێ و گه‌لێ فه‌له‌ستینێ د قۆناغێن جودا جودا دا خه‌باتا ره‌وا یا گه‌لێ فه‌له‌ستین هه‌ر ژ سه‌رده‌مێ سه‌رۆك یاسر عه‌ره‌فات تا سه‌رۆك مه‌حموود عه‌باس و دوپاتى ل هندێ كر كو دۆزا گه‌لان ئه‌گه‌ر ل هنده‌ك وه‌ستگه‌هان دا تووشى وه‌ستیانێ ببن، به‌لێ چ ده‌مان دوماهى ناهێن و هیڤى ژى خواست كو دوماهى ب وان كاره‌ساتان بهێت یێن ب سه‌رێ گه‌لێ فه‌له‌ستین هاتى و دۆزا ره‌وا یا گه‌لێ فه‌له‌ستینێ ب ئاشتى و چاره‌یێن ره‌وا و هه‌رده‌مى بگه‌هیت.