پێكهاتهیێن توركمانى و ئاشوورى و كلدانى و سریانى و ئهرمهنى یێن ههرێما كوردستانێ ههلویستێ خۆ ل دۆر بڕیارا دادگهها فیدرالى یا ئیراقێ یا ههلوهشاندنا كورسیێن كۆتا د پهرلهمانێ كوردستانێ دا راگههاندن و ئهو بڕیاره ب كۆدهتا ل سهر دهستوورى بناڤكرن.
محهمهد ئیلخانى سهرۆكێ پارتا گهشهپێدانا توركمانى بهرى دهمهكێ كێم پهیامهك ب ناڤێ پێكهاتهیان پێشكێشكر و راگههاند "بڕیارا ئهڤرۆ بڕیارهكا سیاسى بوو د بهرژهوهندیا لایهنهكێ سیاسى یێ د ههلبژارتنێن بۆرى دا تووشى لاوازى و كێشهیێن ناڤخۆیى بووى".
گۆت ژى "ئهم وهك پارت و لایهنێن سیاسى یێن توركمان، كلدان، ئاشوورى، سریان و ئهرمهن داخواز ژ سهرۆك مهسعوود بارزانى دكهین كو ڤێ نهدادپهروهریێ رهتبكهت چونكى ب تنێ ئهو د درێژیا دیرۆكا خۆ یا سیاسى دا ههردهم داكۆكیكارێ راستهقینه بوویه ل مافێن مرۆڤى و مافێن پێكهاتهیان".
ناڤهاتى زێده ژى كر "ههمى لایان ئاگههدار دكهین كو ئهم پاشگهز نابین و دێ بهردهوام بین د خهباتا سیاسى و دپلۆماسى یا خۆ دا ژ بۆ خزمهتكرنا نیشتیمانى و دێ دهنگێ خۆ گههینینه جڤاكێ نێڤدهولهتى و نهتهوهیێن ئێكگرتى".
دادگهها فیدرالى یا ئیراقێ ئهڤرۆ چارشهمبیێ بڕیارا نههێلانا 11 كورسیێن كۆتایان د پهرلهمانێ كوردستانێ دا دابوو، پشتى بڕیارێ ژمارهیا كورسیێن پهرلهمانێ ههرێما كوردستانێ ژ 111 كورسیان بوونه 100 كورسى.