سهرۆكێ ههرێما كوردستانێ ب فهرمى بۆ سهرهدانا وهلاتێ نهمسا هاته گازیكرن و دوپاتى ل سهر حهزا دولایهنى بۆ پێشڤهبرنا پهیوهندیان هاته كرن.
سهرۆك نێچیرڤان بارزانى ئهڤرۆ ئهینیێ ههڤدهم ل گهل پشكداریێ د كۆنفرانسێ میۆنشن یێ ئاسایشێ دا ل گهل ئهلێكساندهر شالنبێرگ وهزیرێ دهرڤه یێ نهمسا كۆمبوو و تێدا دانوستاندن ل دۆر پهیوهندیێن نهمسا ل گهل ئیراقێ و ههرێما كوردستانێ كرن.
سهرۆكاتیا ههرێما كوردستانێ د بهیانهكێ دا راگههاند؛ وهزیرێ دهرڤه یێ نهمسا ب فهرمى سهرۆك نێچیرڤان بارزانى بۆ سهرهدانا نهمسا گازیكر.
سهرۆكاتیێ دیاركریه "د كۆمبوونهكێ دا، ههردو لایان بۆچوونێن خۆ ل دۆر مهترسیێن رهوشا ئالۆز یا رۆژههلاتێ ناڤهراست و پێشهاتێن شهڕى ل غهزه و گهفێن ل سهر ئاسایش و سهقامگیریا جیهانێ و كارتێكرنێن خراب یێن وێ ل سهر ههمى بوارێن ژیانێ بهرچاڤكرن".
"ههردو لایان دوپاتى ل سهر حهزا دولایهنى بۆ پێشڤهبرنا پهیوهندیێن نهمسا ل گهل ئیراقێ و ههرێما كوردستانێ د ههمى بواران دا كرن، وهزیرێ دهرڤه یێ نهمسا دوپاتكر كو وهلاتێ وى ب گرنگى ڤه ل پهیوهندیێن ل گهل ئیراقێ و ههرێما كوردستانێ دنێریت"، وهكى بهیانا سهرۆكاتیێ ئاماژهپێكرى.
ژ لایێ خۆڤه، سهرۆكێ ههرێما كوردستانێ سوپاسیا نهمسا ژ بهر پشتهڤانى و هاریكاریا وێ بۆ ههرێما كوردستانێ كر و هیڤی خواست ئاستێ پهیوهندیان د ههمى بواران دا بهرفرههـ ببن.